Reëlings as die dood intree
Die dood kom dikwels skielik en as ’n skok. Iemand moet inspring om die begrafnis of verassing en afskeidsdiens te reël. Waar begin ’n mens met die lyksversorging, om geliefdes in kennis te stel en die begrafnisreëlings?
Spesifieke reëlings moet getref word wanneer iemand tuis sterf. Kontak eerstens die oorledene se naaste familie, soos die gade, kinders, ouers, broers en susters. Ontbied die huisdokter wat die tyd van afsterwe kan bepaal en die sterftesertifikaat kan uitreik. Kontak ook die gesin se predikant en ontbied die ambulans of begrafnisondernemer om die lyk te kom haal.
Druk die oorledene se oë toe deur jou hand oor albei oë te vryf. Ná afsterwe verslap die spiere en vog verlaat die liggaam. Gebruik ou komberse of plastieksakke om onder die lyk in te skuif. Gooi ’n laken of ’n kombers oor die lyk (en hoof).
Ontbied die polisie in die geval van onnatuurlike oorsake. Moenie die toneel versteur nie. In die geval van ’n ongeluk, tuis of elders, mag die liggaam ook nie verskuif word nie. Los die toneel soos dit is en kontak die polisie, dokter, die naaste hospitaal en ambulans. Gooi die lyk toe.
In alle gevalle moet die naasbestaandes aandring op die sterftesertifikaat of die plek waar dit afgehaal kan word, byvoorbeeld by die huisdokter of staatspatoloog. Weet ook altyd waarheen die lyk geneem word en wanneer die begrafnisondernemer mag oorneem. Wanneer iemand in ’n hospitaal sterf, sal die hospitaal met die reëlings help.
Hou die oorledene se identiteitsdokument byderhand sodat alle belanghebbendes die korrekte inliging kan kry, maar moenie dié dokument uit jou hande laat gaan nie.
BANKREKENING
Die gade moet die oorledene se bankier besoek om ’n oortrokke gerief te reël, selfs al het die gade tekenregte op die oorledene se bankrekening wat gevries gaan word.
As die oorlede die alleeneienaar van ’n onderneming was, gaan daardie onderneming se bankrekening ook gevries word, al het iemand anders tekenregte. Die probleem is dat die onderneming nie kan voortgaan nie, want geld wat inbetaal word, is gevries en geen geld kan uitbetaal word nie. Slegs die eksekuteur mag weer die onderneming se bankrekening open, maar dit duur soms weke om ’n eksekuteursaanstelling te kry. Intussen staan die onderneming stil en gewoonlik word dit vir ’n appel en ’n ei verkoop.
Indien die onderneming ’n mede-eienaar(s) het, kan die bank nie die rekening vries nie. Al het die mede-eienaar slegs 1% van die aandele, los dit die probleem op. Die medeeienaar kan die gade wees, want ’n skenking aan ’n gade vereis geen skenkingsbelasting nie. Indien van die aandele in ’n trust is, kan die bank ook nie die rekening vries nie.
VOOR DIE BEGRAFNIS
Dokumente, soos die oorledene se identiteitsdokument en sterftesertifikaat, moet beskikbaar wees, sowel as geld (sowat R15 000) vir die begrafnisondernemer. Indien daar ’n begrafnispolis is, moet dit in werking tree.
Die sterfte moet by die Departement van Binnelandse Sake geregistreer word. Die begrafnisondernemer help gewoonlik daarmee. Die begrafnisondernemer kan ook help as die sterftesertifikaat nog nie gereed is nie.
Die familie moet by die polisie aansoek doen om ’n verwyderingsbevel om die lyk van een munisipale gebied na ’n ander te vervoer. Die polisie of begrafnisondernemer kan hiermee help. Reël ook met die verkeersdepartement as die stoet ná die begrafplaas deur die dorp gaan.
DIE GEDENKDIENS
Vra ’n predikant, priester of pastoor om die diens te lei en maak seker van die datum, tyd en plek. Reël die regte soort seremonie (begrafnis met ’n teraardebestelling of ’n gedenkdiens), soos die familie dit verkies. Die prediker behoort die Skrifgedeelte en liedere vooraf met die gade en kinders te bespreek.
Vra vriende of familie om die bedankings te doen en huldeblyke te lewer.
Die seremoniebrief moet saamgestel word en bevat gewoonlik ’n foto, ’n teksgedeelte, bedankings, die name van die kisdraers, ’n huldeblyk, die datum, tyd en plek en die oorledene se geboorte- en sterfdatum.
Reël die orrelis sowel as ander musikante of sangers indien nodig. Reël ook video- of skyfievertonings en foto’s, sowel as tee, koue water en verversings.
Mnr. Andrè Eloff is ’n regs-en-besigheidskonsultant van die finansiëledienstemaatskappy Allegiance Consulting.