Vra vir Faffa

Ek het sitrusbome waarvan die blare geel word. Organiese kunsmis het min gehelp. Is dit moontlik weens ’n ystertekort in die grond? Is die vergeling van die blare byvoorbeeld op die ou of nuwe blare, of op albei? Is die vergeling egalig oor die blaar versprei?

Is daar enige nekrotiese (dooie) dele op die blare? Wat was die samestelling van die organsiese kunsmis en watter elemente is teen watter hoeveelhede toegedien? Is genoeg daarvan toegedien om die probleem op te los?

Verskeie faktore kan die geel blare op die sitrusbome veroorsaak, naamlik elementtekorte, die grond se vogstatus, siektes, braktoestande in die grond of water en blare se ouderdom.

ELEMENTTEKORTE

Tekorte aan stikstof, swael en yster kan algemene vergeling van die hele blaar veroorsaak.

Stikstoftekorte toon algemene blaarvergeling van hoofsaaklik ouer blare. Stikstof is hoogs translokeerbaar. Dit kan dus maklik uit ouer blare na nuwer blare translokeer indien die behoefte ontstaan, daarom word die simptome meestal by die ouer blare gesien. Die toediening van ’n stikstofbron op die grond as kunsmis kan die probleem maklik oplos.

Ystertekorte toon algemene vergeling van die jonger blare, met die blaarnerwe wat groen bly. Ystertekorte gaan gewoonlik gepaard met grond met ’n hoë pH en kan reggestel word met ystertoedienings op die grond of ’n pHregstelling van die grond. Ystertekorte kom algemeen voor waar bome in grond geplant word waarin daar oorblyfsels van bourommel is.

Swaeltekorte toon soortgelyke simptome as stikstoftekorte, maar kom nie algemeen voor nie. As dit wél voorkom, sal jonger blare meer daardeur geraak word. Die toediening van swaelbevattende kunsmis op die grond kan die probleem oplos.

Ander elementtekorte kan ook die vergeling van blare veroorsaak, maar nie vergeling van die hele blaar nie. Magnesiumtekorte veroorsaak vergeling van die punt af van ouer blare, met die deel rondom die blaarsteel wat groen bly. Magnesiumtekorte kan met ’n magnesiumblaarvoeding reggestel word.

Mangaantekorte toon tussennerfse vergeling van jong, maar afgeharde blare. Die meerderheid van die blaar bly groen, behalwe in die geval van ernstige tekorte. Mangaantekorte kan met ’n mangaanblaarvoeding reggestel word.

VOGSTATUS

Watertekorte gaan nie noodwendig die vergeling van blare veroorsaak nie, maar die opname van mikro en makroelemente, soos stikstofopname, kan benadeel word en dit lei tot geel blare. Té min water veroorsaak meestal min nuwe groei van die boom, of swak groei van lote wat wél ontwikkel.

Te veel water druk die suurstof uit die grondprofiel. Sonder suurstof kan wortels nie optimaal voedingstowwe opneem nie, wat weer geel blare kan veroorsaak. Die suurstoftekort plaas ook bome onder stres, wat hulle weer vatbaar maak vir wortelsiektes, soos Phytophthorawortel en kraagvrot.

SIEKTES

Bome met Phytophthorawortelvrot sukkel om elemente doeltreffend op te neem weens verminderde wortelvolume en min nuwe, wit wortelpunte. Blare vergeel en lyk dieselfde as blare met stikstoftekorte, maar in ernstige gevalle van wortelvrot val blare af en takke sterf terug. Die probleem kan meestal opgelos word deur bome net minder water te gee en seker te maak die grondprofiel droog goed uit voordat water weer toegedien word.

BRAK TOESTANDE

Ernstige brak toestande, wat deur soute in die grond of water veroorsaak word, kan ook geel blare veroorsaak. Gewoonlik is die simptome dooie blaarpunte, asook blare wat van die blaarpunt af tot by die blaarsteel vergeel. Bome in potte wat gedurig kunsmis kry, sonder die uitwas van soute af en toe, wys gereeld dié simptome. Blaarval kan ook in ernstige gevalle voorkom.

BLAAROUDERDOM

Sitrusblare se leeftyd is 12 tot 24 maande (gemiddeld 17 maande). As die blaar se leeftyd dus verby is, word stysel en stikstofreserwes terug in die boom getranslokeer, die blare word geel en val dan af. Dit is ’n natuurlike proses, maar die hoeveelheid blare wat geel word en afval, kan vererger word deur enige stressituasie, soos elementtekorte, wortelsiektes, braktoestande en as die vogstatus van die grond nie optimaal is nie.