Mark open nuwe deure vir Limpopo-boere
SOOS Mooketsi, spog Polokwane in Limpopo nou ook met ’n private varsproduktemark waar groot én klein boere van die omgewing hul produkte so te sê op hul eie voorstoep kan lewer.
Die mark is ’n projek wat spruit uit ’n klein, private mark van ZZ2 net buite dié stad waar hoofsaaklik met tamaties en uie handel gedryf is.
Die Farm Gate Exchange (FGX) Groep en die RSA Groep het saamgewerk om ’n mark daar te stel waar meer produkte van alle boere in die omgewing verkoop kan word. Die nuwe Polokwane-varsproduktemark, wat deur FGX bestuur word met RSA as die enigste agent op die vloer, het reeds 9 000 geregistreerde kopers. Die Mooketsi-mark, wat reeds in 2014 geopen is, het al 11 000 kopers.
Die mark bied nie net ’n welkome afsetpunt vir kommersiële boere nie, maar maak dit vir talle opkomende boere van die omgewing moontlik om hul produkte op ’n varsproduktemark te lewer.
SMOUSE
“Hier is ’n spesiale afdeling vir opkomende boere se produkte. Van hierdie boere is só klein dat hulle hul groente met ’n ou Toyota Corolla hierheen aanry. Daar is geen manier waarop ’n boer met so min van ’n produk sy produk-
te op Johannesburg of Pretoria se mark kan gaan lewer nie,” sê mnr. Luan Wentzel, die RSA Groep se bestuurder op Polokwane.
Dit is egter nie net plaaslike boere wat daar produkte lewer nie. Aartappels in verpakkingsmateriaal van sommige van Suid-Afrika se grootste aartappelboere is op die vloer te sien en daar is appels van agt verskillende boere in die Wes-Kaap.
Die meeste van die vars produkte wat daar verkoop word, beland in straatsmouse se stalletjies. Wentzel sê die informele mark verteenwoordig omtrent 75% van die omset, terwyl die formele kleinhandel omtrent 15% verteenwoordig. Aankope van plaaslike huisvroue verteenwoordig sowat 5% van die algehele omset van R9 miljoen tot R12 miljoen per maand.