Finansies en versekering
Die speelveld vir landbouversekering het pas verander met die vorming van ’n nuwe Hollard Agri-span.
Mnr. Andries Wiese is van 1 September af die hoof van Hollard Insure, Hollard se afdeling vir korttermynversekering, se nuwe Agri-span. Hy is verantwoordelik vir al die produkte vir landbouversekering.
Wiese wil Hollard, Suid-Afrika se grootste onafhanklike versekeringsmaatskappy en naasgrootste korttermynversekeraar, uitbou tot die land se voorkeur-landbouversekeraar.
GEESDRIF EN LEIERSKAP
Wiese het 27 jaar ondervinding in die versekeringsbedryf en is veral bekend om sy geesdrif en leierskap in die landbousektor oor die afgelope sewe jaar.
Hy het voorheen vir Santam en daarna meer as twee dekades vir Mutual & Federal gewerk.
“Die belangrikheid van die landboubedryf kan gesien word in die uitwerking wat dit op die ekonomie en gemeenskappe het,” sê hy en verwys na die onlangse nuus dat die sterk groei in die landboubedryf op ’n kwartaalgrondslag tot groei van 2,5% in die bruto binnelandse produk gelei het. Dít het gehelp om Suid-Afrika uit ’n tegniese resessie te lig.
“Groot dele van die land maak volkome op die landbou staat om te kan oorleef,” sê Wiese.
“Die landbou is meer as net besigheid, want ’n gemeenskap en sosiale verantwoordelikheid is ter sprake. Die landbou is soveel meer as net ’n stuk grond en ’n plaashek.”
NUWE UITDAGING
Wiese het spesifieke planne om Hollard se markaandeel in die landbousektor te vergroot, onder meer deur “betekenisvolle versekeringsprodukte vir die moderne boer” te ontwikkel.
“Ek pas maklik aan by Hollard, want Hollard is soos ’n boer: Dit maak ’n plan en kom met praktiese oplossings vorendag. Hollard neem die regte besluite en nié net omdat dit kommersieel sin maak nie.”
Wiese sê verskillende gebiede in Suid-Afrika se toestande, werklikhede en behoeftes verskil hemelsbreed en sy span moet raad en nommerpas versekeringsdekking vir elke streek kan bied. Hollard se benadering is dié van “local is lekker” en die maatskappy wil plaaslike kundigheid aan boere bied.
“Ons wil die landbougemeenskap ondersteun. Met die ondersteuning van ’n groep wat reeds sy bona fides op ander gebiede bewys het, is hierdie vir my ’n geleentheid om ’n verskil te maak,” sê hy.