Buitelewe
Sodra die mielies geplant, die besproeiing opgestel en die plaasbestuurder se voete en oë in die landerye is, kan die boer met vakansie gaan en ’n ruskans geniet. Die wêreld lê oop voor ons – van ons buurlande in Afrika tot in Europa.
Nuwe ondervindings en besoeke aan plekke waar hy nog nie voorheen was nie, is boaan die wenslysie van mnr. Ghini Greyling, ’n boer van Wakkerstroom in Mpumalanga en ’n ambassadeur vir Naturehike Africa, wanneer hy gaan vakansie hou.
Ghini is die seun van mnr. BP Greyling en hulle boer met wol- en vleisskape, vleisbeeste en graan. Hulle kweek ook raaigrasen sojaboonsaad.
“Sodwanabaai aan KwaZuluNatal se kus bly my gunstelingbestemming.
“Ek geniet dit om vis te vang en te gaan duik en die natuurskoon te waardeer. Van Sodwanabaai af tot op Kosibaai is dit nog baie afgesonder en landelik. Mense het nog nie hul stempel daar afgedruk nie. Dit is ook net drie uur se ry van die plaas af. Ek kan dus ’n vinnige naweek daarvan maak en weer Maandag terug op die plaas wees om te werk,” sê Ghini.
Met dié dat hy op ’n plaas woon, verskaf Jan Tuisbly se karretjie ook vreugde. Om saam met sy vriende en kollegas op die plaas te kampeer, is vir Ghini net so lekker soos om vakansie te hou.
“Om te boer is ’n leefstyl, en ek ervaar dit soos vakansie. Ek is dus baie gelukkig in my werk. Daarom geniet ek dit om op die plaas langs die rivier saam met my vriende en honde te braai.
“Ek het nie nodig om ver te reis om die vakansiegevoel te kry nie.”
GESINSTYD
Mnr. Frans Seevinck, ’n Bonsmaraboer in die distrik Vryburg in Noordwes, se gunstelingvakansieplek is om al langs die kus van die Tuinroete of die suidkus in KwaZuluNatal te ry.
“Ek sal graag na die noorde van Botswana toe wil vlieg, maar ons het mos maar almal met ’n seevakansie grootgeword.
“My kinders geniet die strand baie. Vir kinders wat nie naby die see woon nie, is die strand en see eksoties en heeltemal anders as die omgewing op die plaas.
“Die natuurlewe bo in die Chobewildreservaat en Linyantipark in die noorde van Botswana is verstommend mooi,” sê hy.
“Vakansies gaan vir my daaroor om tyd saam met my gesin, vriende en familie deur te bring en om te ontspan. Wanneer ons see toe gaan, verkies ons gewoonlik ’n selfsorgeenheid met ’n seeuitsig.”
VOORBEREIDING
Dit is belangrik om te weet waarheen jy wil gaan en of jy alleen of in ’n groep wil reis, sê me. Annette Bezuidenhout van die plaas Welgelegen naby Delmas in Mpumalanga,
“As jy oorsee reis, moet jy ook weet waarheen jy oral met jou visum kan gaan, veral as jy in ’n vreemde land moet oorstaan. Nadat ons reeds vertrek het, het ons tydens ’n bootreis in Britse water uitgevind ons het ’n visum vir Engeland nodig, selfs al klim ons nie van die boot af nie.”
Annette sê Europa is vir haar ’n interessante bestemming omdat die kultuur so anders is.
“Ek sal ’n bustoer aanbeveel omdat jy dan saam met verskillende mense van verskillende nasionaliteite reis. Die atmosfeer is ook baie lekker en jy maak goeie vriende.
“Die natuurskoon in Skandinawiese lande, soos Denemarke, Swede en Noorweë, is beson ders. Jy hou stil by watervalle en riviere, en daar is merkwaardige landskappe om te sien.”
Die Italiaanse platteland het Annette se asem weggeslaan.
“Tydens ’n toer het hulle ons na ’n plaas toe geneem waar ons wyn kon proe. Dit was baie interessant om te sien hoe hul wingerde lyk en hoe hulle die wynproe aanbied. Olyfplase is ook baie gewild tydens sulke toere. Die boere is gretig om vir jou te wys hoe hul plase lyk en hoe hulle werk.
“Vir my was die grootste verskil tussen die wynproetoere wat ons in Italië en Griekeland gekry het, die inhoud van die toer self. In Italië, byvoorbeeld, het ons eers ’n toer na die wingerde toe gehad waar die gids ons meer vertel het van die terroir en die verskillende kultivars wat gebruik word om die wyn te maak. Toe is ons na die kelder geneem vir ’n tradisionele wynproe.
“In Italië het dit my opgeval dat daar so min moontlik menslike invloed op die wingerde uitgeoefen word. My man het ’n stroom gesien wat naby die wingerd verbyloop en gevra of die wingerde uit die stroom