Markte

Altesame 17,4 miljoen ekwivalente kartonhouers pere is tot dusver vanjaar vir die uitvoermark goedgekeur. Dit is sowat 2% minder as in die vorige produksiejaar.

Volgens Hortgro het die uitvoervolume van Forelle-pere egter met 8% teenoor verlede jaar gestyg. Die toename word hoofsaaklik toegeskryf aan jong boorde wat in drag gekom het. Die grootste daling in uitvoer was ten opsigte van Abate Fetel en Vermont Beauty wat met onderskeidelik 14% en 13% teenoor die vorige produksiejaar afgeneem het.

Volgens die 2016-boomsensus is daar tans 12 279 ha peerboorde in Suid-Afrika. Peerboomaanplantings het sedert 2007 met 7% toegeneem. Die belangrikste produksiegebiede is Ceres (waaronder Wolseley en Tulbagh) met 49%, gevolg deur Elgin (waaronder Grabouw, Villiersdorp en Vyeboom) met 21% en die Langkloof (15%).

Hortgro sê die ouderdomsverspreiding van peerbome is baie gesond, met sowat 6% van alle aanplantings wat tot drie jaar oud is. Cheeky is veral een van die nuwe kultivars wat in gewildheid toeneem. Aanplantings daarvan het in die afgelope vyf jaar van 146 ha tot 348 ha verdubbel.

Sowat 49% van Suid-Afrika se peer-oes word uitgevoer, met 14% wat plaaslik verkoop word en 34% wat ingemaak word. Net sowat 3% van die oes word gedroog.