Nuut opdierak! NUTTIGE SONPOMP OP WIELE

Dié sonkragopwekker op wiele kan jou baie moeite en geld bespaar. Mnr. Hannes van Niekerk van Kimberley, eienaar van die maatskappy SAW Africa, het hierdie nuttige mobiele sonkragopwekker gebou met die doel om water op enige plek met behulp van sonkrag te pomp.

Die wa met sy 18 sonpanele kan 4,9 kW krag opwek. Hannes het ’n 4 kW-motor op die wa geïnstalleer wat ’n pomp met ’n 160 mm-stuwer aandryf. Die pomp kan water van ’n diepte van 4 m optrek en 24 m3 per uur teen ’n druk van 300 kPa lewer.

Die wa het ook ’n omsetter wat die direkte stroom wat deur die sonpanele gelewer word, na driefase-wisselstroom (400 V) omskakel. Die omsetter verstel die motorspoed outomaties om by die sonpanele se lewering en die drukbehoefte van die pompstelsel aan te pas. Dit kan ook verstel word om die pomp aan normale driefasekrag te koppel. Die installasie kan ook aangepas word om krag te lewer vir ander toestelle wat driefase-wisselstroommotors gebruik, soos hamermeulens, waaiers, ratkaste en spilpunte. Die toestel het ’n maksimum kragopwekkingsvermoë om ’n motor van tot 3,7 kW aan te dryf.

’n Mens kan die sonpanele op die wa platslaan as jy dit rondsleep. Die sonpanele, motor en pomp weeg saam ongeveer 1 200 kg, is 6 m lank en 2,4 m breed wanneer die sonpanele platgeslaan is en 4,8 m breed as dit oopgeslaan is. Prys: R136 800 (vervoerkoste uitgesluit). NAVRAE: E-pos: hannes@sawafrica.co.za, sel 083 264 1272.