MELKSKAPE: GRYP GROEIMOONTLIKHEDE AAN

Hoewel daar tans nie groot belangstelling in melkskape in die kommersiële landbou is nie, bestaan uitstekende moontlikhede vir mense wat uit stede trek en selfonderhoudend wil leef.

“Belangstelling groei veral in die Wes-Kaap,” sê me. Elmarie van Aswegen van Smithfield, een van die eerste erkende Awassi-melkskaapboere in Suid-Afrika. ’n Melkskaaptelersgenootskap kan in die toekoms gestig word. Wes-Kaapse melkskaapboere het die meeste van hul skape by haar gekry.

Oorspronklik is Oos-Friesmelkskape ingevoer en met Dorpers, Afrino’s, Landskape en Ronderib-Afrikaners gekruisteel. “Ek het in 2012 drie Awassiramme uit Australië ingevoer en met my melkskape met Oos-Friesteelmateriaal gekruisteel. Ek is tans een geslag weg daarvan om rasegte Awassiskape te teel.”

“Melkskape is baie maklik hanteerbaar en kan as driedoelig gesien word – melk, wol én vleis. Hul wol is egter nie sterkwol nie en is nie veel werd nie.”

Melkskape is nie baie seisoensgebonde nie en kan elke agt maande lam. Volgens Van Aswegen oortref die gesondheidswaarde van skaapmelk dié van enige ander soort melk.

Sy verkoop skaapmelk teen R20 per liter. Voeding en die laktasiestadium bepaal opbrengs, maar gemiddeld lewer ooie 1,2 liter per dag, hoewel uitsonderlike ooie tot 4 liter per dag kan lewer.

Vir meer inligting, besoek Van Aswegen se webtuiste www.sa sheepdairy.co.za.