Rovic Leers vier 90 jaar!
Op die gebied van werktuie en landboutoerusting het die maatskappy Rovic Leers geen bekendstelling nodig nie. Danksy tegnologie en voortdurende vernuwing lewer die maatskappy ná 90 jaar steeds puik diens aan klante oor die hele Suid-Afrika.
Rovic Leers (Edms.) Bpk., ’n filiaal van die Rovic Agri Groep, bemagtig boere al 90 jaar lank om vandag se struikelblokke in nuwe geleenthede vir die toekoms te omskep deur uitmunlandbou tende diens saam met produkte van topgehalte te lewer. Die maatskappy se toekomsbenadering is die grondslag van Rovic Leers se bedrywighede, sê mnr. Marius Ras, bemarkingsdirekteur by Rovic Leers.
“Die voortbestaan en uitbouing van die kommersiële kan slegs volhoubaar wees as ons natuurlike hulpbronne, soos grond en water, as die hoogste prioriteit korrek bestuur. Bewaringslandbou is dus ononderhandelbaar. Dit behoort die grondslag te vorm van alle praktyke en tegnologieë wat vir die toekoms ontwikkel word.
“Ons verstaan ons klante se behoefte aan persoonlike diens en ook dat die vrylike beskikbaarheid van e-data noodsaaklik is. Gevolglik het ons 17 areabestuurders wat saam met vyf tegniese personeellede vanuit vier strategies geplaaste sakeeenhede ontplooi is om diens te lewer aan ons klante en handelaars in die hele Afrika suid van die Sahara.
“Ons strategie is om deurentyd in regstreekse kontak met ons klante te wees om sodoende ’n helder beeld van hul behoeftes te kan kry. Só kan ons die nodige insette gee rondom die optimalisering van verskillende meganisasie-oplossings wat beskikbaar is.”
NEGE DEKADES
Die rigting wat Rovic Leers in die toekoms wil inslaan, het in 1927 begin danksy ’n ontmoeting in ’n oorlogskamp. Mnre. Hans Martin Leers en Rud Sack, wat toe reeds die Rud Sack-ploegmaatskappy in Duitsland op die been gebring het, was tydens die Eerste Wêreldoorlog saam krygsgevangenes in Pietermaritzburg. Rud het aan Hans die alleenagentskap vir Rud Sack-ploeë in Suid-Afrika beloof. Ná die oorlog het Hans sy agentskap na die destydse Afrikaanse Handelshuys geneem en die werktuie van daar af bemark. Op 30 November 1927 het Hans ’n maatskappy, HM Leers (Edms.) Bpk., geregistreer.
HM Leers se eerste produkte was Rud Sack-ploeë, Stock-trekkers, Norhamma-stowe en Regoskeiers. In dieselfde jaar, op pad na ’n demonstrasie, was Hans in ’n noodlottige ongeluk. Die maatskappy is toe deur sy swaer, dr. E. Reunigen, oorgeneem.
In 1958 het Fendt & Co aandele in HM Leers bekom en só het HM Leers die alleenagentskap vir Fendt-trekkers gekry.
Beperkte suksesse in ’n moeilike tydperk het gevolg en teen 1960 was die maatskappy by ’n kruispad. In Maart 1967 het mnr. Carl Heinrich Rickens die maatskappy se bestuur oorgeneem, en met behulp van sy seun Charles en mnre. JC Smit, Nick Sanders en Stanley Robyn die maatskappy van voor af opgebou. Carl se uitgangspunt was om weg te stap van die kleinhandel-sakemodel en eerder die maatskappy se produkte as groothandelaar deur koöperatiewe netwerke te versprei.
Handelsname, soos Kuhn, Cima, Tecnoma, Amazone, Kuxmann, Alko, Goldsaad, Maletti en Mengele, was van die vroegste ingevoerde handelsmerke wat HM Leers versprei het. Produkte van Krone, Cicoria en Degania het later die maatskappy se aanbod aangevul.
Ná Rickens sr. se uittrede het Charles die eienaarskap en bestuur van HM Leers by sy pa oorgeneem.
BEGINJARE
Intussen is die Rovic-maatskappy en -agentskappe in 1964 op Stellenbosch gestig met die oogmerk om net ingevoerde produkte te bemark. Weens die handelsanksies teen Suid-Afrika tydens die apartheidsjare het die stigter, mnr. Buck Burke, plaaslike vervaardiging begin oorweeg.
In 1974 is met die plaaslike vervaardiging van die steeds bekende Rovic-kalkstrooiers begin. In 1979 is begin om die strooier na Engeland uit te voer en later is die Rovic-kalkstrooier ook na Australië uitgevoer.
Rovic-laaigrawe, Howarddraaiskoffels en grondwerktuie van John Shearer was van die belangrikste reekse wat bemark is. Later het Reekie, Connor Shea, Stanhay, Seko en Sunflower die aanbod van Rovic aangevul.
Rovic se nuwe geriewe in Blackheath naby Kaapstad is in 1986 bekom ná ’n transaksie tussen dr. Eddie de Villiers en mnr. Lewis Burke, Buck se seun. Dit het ’n nuwe era, met ’n aggressiewe groei- en uitbreidingsvisie, vir Rovic ingelui met Eddie as besturende direkteur.
SAMEWERKING
In 2000 is die maatskappye Rovic en HM Leers saamgevoeg om die nuwe en huidige Rovic Leers (Edms.) Bpk. tot stand te bring.
Rovic Leers is vandag ’n spesialis-voorsiener van landboumeganisasie-oplossings regoor die spektrum van die kommersiële landbou in Afrika suid van die Sahara.
Nuwe handelsname soos Alo Quicke-laaigrawe, KMC-grondboontoerusting, neut-oestoerusting van Flory en Coe, asook boomsnoei-apparate van Gillisons voltooi die wye aanbod.
“Ons is toegespits op toerusting vir landboumeganisasie, soos baalnet en plastiek, grondslytdele, rugsakspuite, balkrane en verskeie ander komponente, en dus is ons ’n top-opsie vir ons klante.
“In ons plaaslik vervaardigde reeks Rovic-produkte het produklyne, soos Rovic-kleinsaadplanters, Rovic-rygewasplanters, Rovic Syncroflow®-wingerd- en boordspuite en ons primêre grondwerktuie, die oorspronklike Rovic-kalkstrooier aangevul tot ’n wye reeks hoëtegnologie-oplossings vir meganisasie,” sê Marius.
“Patente, soos die dubbelsaadlepeltegnologie en die Evenflow® toringtegnologie verseker ons klante van verhoogde doeltreffendheid en laer insetkoste.
“Ons het meer as 100 toegeruste handelaarsdienspunte in die hele gebied. Ons is gereed om die nodige inligting en naverkoopsdiens van die Rovic Leersreeks aan klante te bied,” sê Marius.
SUKSESVERHALE
“Omdat ons die afgelope dekade klem gelê het op die ontwikkeling van eg SuidAfrikaanse toerusting wat aan wêreldstandaarde voldoen, kon ons oor die jare uitstekende suksesse met ons eie produkte behaal. Ons vertroue in die landbou neem ons op die pad van beleggings in navorsing en evaluasie om inligting van topgehalte aan klante te voor sien. Dit lei daartoe dat ons toerusting beter aangewend word deur die korrekte toepassing van verbeterde tegnologie. Dit is ons poging om volhoubare, produktiewe bewaringslandbou te ondersteun,” sê Marius.