WILDBOERE MOET POLITIEK KANPRAAT–PEPLER
DIE toekoms van die wildbedryf lyk tans nog veilig, maar dit is belangrik dat dit op ’n volhoubare wyse bestuur word en dat wildboere se boodskap aan die politici oorgedra word op ’n manier wat politici kan verstaan, sê Dave Pepler, bekende ekoloog en motiveringspreker.
Hy was die genooide spreker op Wildbedryf SA se gala-aand op Jeffreysbaai waartydens die Oos-Kaapse Wildboer van die Jaar aangewys is.
Pepler het gesê dit is onbillik om te verwag dat politici die omgewing sal verstaan soos wat ’n wetenskaplike dit verstaan.
Volgens hom behoort organisasies, soos die WRSA, kenners op te lei om namens die bedryf op ’n politieke vlak te kan kommunikeer.
“Daar is geen twyfel nie dat jag ’n rol speel in volhoubare bewaringspraktyke, maar die belangrikste ekologiese strewe bly om die eiesoortige plek van elke organisme in die omgewing te begryp,” het hy gesê. “Die muskiet en die miskruier, byvoorbeeld, speel elkeen ’n rol in die funksionering van die ekostelsel. Ons het geen idee van die gevolge as een van hierdie spesies uitsterf nie.”
Pepler het ook wildboere gemaan om mooi te besin oor die moontlike impak van genetiese modifikasie op die bedryf. “Talle wildboere gee groot aandag aan die teling van uitstekende diere. Tans word ’n genetiese tegniek (CRISPR) ingespan waarmee spesifieke gene in ’n organisme verander kan word. Wildboere moet nou al besluit of CRISPR (“Clustered Regularly Interspaced Short Palindromic Repeat”) ’n probleem vir hulle kan word en, indien wel, hoe vinnig dit kan gebeur.
Mnr. Warrick Barnard van Woody Cape Wildlife is as die Oos-Kaapse Wildboer van die Jaar aangewys, terwyl mnr. Johan Bouwer (L’Ormarins Farms) die eerbewys as die beste bewaringswildboer ontvang het. Me. Katjana Ott (Glen Harry-natuurreservaat) is die Wildteler van die Jaar en mnr. Loodt Büchner (Tootabi Hunting Safaris) is die beste wildondernemer.
Volgens die WRSA word kandidate vir die eerbewyse deur medeboere benoem waarna tien finaliste gekies word.
Vanjaar se finaliste bestuur altesame 62 500 ha waarop 14 833 stuk wild van 36 soorte aangehou word. Slegs 3,7% van hierdie grond word gebruik vir intensiewe teelprogramme. Altesaam 20,5% van die boerderye word deur buitelandse geld gefinansier. Die gemiddelde ouderdom van die tien boere is 37 jaar.
Verlede jaar se wenner Richard Morton het gesê dat groot dinge moontlik is vir boere wat passievol daaroor is om diere eties te teel en bemark.