Wildsvleispasteitjies
Vulsel
50 g botter en 50 ml olie, om vleis in te braai Ongeveer 2-3 kg wildsvleis met bene (nekstukke, rugstring, bladskywe, skenkels) 1 ui, gekap 2 stele seldery, gekap 2 wortels, skoongeskraap en gekap 2 knoffelhuisies, fyn gekap 100 ml meel gegeur met sout, varsgemaalde swartpeper, 10 ml fyn koljander en 10 ml braaivleisspeserye 2 kruienaeltjies 3 takkies roosmaryn 125 ml droë witwyn 50 ml soet sjerrie 30 ml elk worcestersous en tamatiepasta 500-750 ml kookwater (genoeg om vleis te bedek) 30 ml fyn appelkooskonfyt of bruinsuiker 1 x hoeveelheid skilferkorsdeeg (sien die KASSIE)
Verhit die botter en olie in ’n groot braaipan of gietysterpot en braai die vleisstukkies, ’n paar op ’n keer, tot mooi bruin. Plaas eenkant. Braai die gekapte ui, selderystingels, wortels en knoffel in dieselfde kastrol vir ’n paar minute. Plaas die gegeurde meel en die gebraaide vleis in ’n groot plastieksak en bind toe. Skud goed om die vleis met die meel te bedek. Skud die oortollige meel af en plaas die vleisstukke terug in die braaipan. Voeg die naeltjies en roosmaryn by. Meng die witwyn, sjerrie, worcestersous, tamatiepasta en kookwater en gooi oor die vleis. Laat prut vir 2 tot 3 uur. (Let op dat dit nie droogkook nie.) Alternatiewe metodes: Plaas in matige oond vir 3 uur of tot die vleis baie sag is en maklik van die bene af kom, of kook in stoompot tot sag.
Sodra die vleis sag is, verwyder die bene en roer die konfyt of bruinsuiker by. Indien nodig, verdik die sous met ’n mengsel van meel en Bisto. Skep in ’n oondvaste bak en laat heeltemal afkoel. Maak seker dat alle beentjies verwyder is.
Rol die skilferkorsdeeg op ’n meelbestrooide oppervlakte uit tot ’n groot reghoek en sowat 6 mm dik. Sny die deeg in reghoeke van ongeveer 8 x 15 cm. Plaas ’n lepel vol vulsel op die een kant van die reghoek en rol op om ’n worsrolletjie-effek te skep. Plaas die naat van die deeg onder op die bakplaat en druk effens plat. Sny ’n paar klein snitte op die oppervlak van die pasteitjie. Verf met eierglasuur.
Bevries en bak regstreeks uit die vrieskas sonder om te ontdooi. Voorverhit die oond tot 220 °C. Verlaag die temperatuur tot 180 °C en bak vir 30-35 minute (vir klein pasteitjies). Lewer sowat 3 dosyn klein pasteitjies.