DIE ANDER SÊ
NABY Humansdorp in die Tsitsikamma het ’n gemeenskap swart boere onlangs kontrakteurs aangestel vir ’n roterende 66 puntmelkskuur vir die suksesvolle suiwelonderneming wat hulle deel met die broers mnre. Johan en Willie du Plessis. Die Wittekleibosch-gemeenskap trek ook voordeel uit die 95 MW Tsitsikammagemeenskapswindplaas wat op hul grond geleë is.
Die Du Plessis-broers en die Wittekleibosch-suiweltrust verkoop jaarliks meer as 6 miljoen liter melk. Die grond behoort aan die swart families en die koeie aan die broers.
Die doel van die melkskuur-uitbreiding is dat die gemeenskap sy eie kudde en melkery kan hê. Die R32 miljoen vir die skuur en toerusting is deur die Oos-Kaapse regering voorsien, asook deur kommersiële banke en Die Kooperasie op Humansdorp.
Die vennootskap tussen die Wittekleibosch-gesinne en die Du Plessis-broers het begin toe die Tsitsikamma-Mfengu hul grond maande voor die 1994-verkiesing teruggekry het. Die apartheidsregering het hulle in 1977 van die grond afgesit. Die Tsitsikamma Exiles Association, wat hom vir jare beywer het vir restitusie, het homself as die Tsitsikamma Development Trust hervorm en regeringsgeld gekanaliseer om wit boere op die grond uit te betaal.
Die Wittekleibosch-gemeenskap, een van die Tsitsikamma Mfengu se vier gebiede, het Johan du Plessis gevra om aan te bly en die suiwelplaas te bedryf.