KHOISAN TEA KRY NUWE BAAS
IN dieselfde maand waarin hy Sonnendal Dairies in die WesKaap gekoop het, het Libstar Operations in November ook ’n beherende aandeel in Khoisan Tea Import and Export, ’n verwerkings-, verpakkings- en uitvoermaatskappy naby Clanwilliam, bekom. Khoisan voer die afgelope 20 jaar tee na hoofsaaklik Duitsland uit.
Die transaksie kom te midde van groot druk op die rooibosbedryf weens die droogte in die Wes-Kaap. Hoewel die verdienste per kilogram tans styg, is volumes laag en die totale plaashekverdienste dus onder druk. Groot prysstygings die afgelope drie jaar het ook die vraag uit die buiteland nadelig geraak.
“Libstar het uitstekende netwerke – plaaslik én internasionaal – in die groot- en kleinhandelsektor en kan dus nuwe geleenthede vir Khoisan bewerkstellig,” sê me. Maristha Slabbert, woordvoerder van Khoisan. “As pryse konstant, redelik en mededingend op die wêreldmark is, is daar groot potensiaal vir rooibos,” sê sy.
Die mark vir dié tee het in Duitsland reeds ’n paar jaar gelede ’n hoogtepunt bereik en groei vind nou elders plaas. Die buitelandse verbruik het egter reeds met tot 20% gedaal weens die hoë pryse. “As hierdie neiging voortduur, sal ons toegang tot uitvoermarkte wat ons 20 jaargekoshetomoptebou,verloor,” sê sy.
“Die enorme wisseling in die prys van rooibostee is ’n verskynsel wat al dekades lank voortduur en is vir niemand in die bedryf tot voordeel nie. Ons meen met ’n stabiele mark, soos wat moontlik is met Libstar as ’n vennoot, is dit moontlik om die stabiliteit en volhoubaarheid aan ons produsente oor te dra en op so ’n wyse volgehoue groei in die rooibosteebedryf te verseker.”