VRYE HANDEL IN AFRIKA BEREIK VOLGENDE MYLPAAL IN MAART
DIE ooreenkoms wat ’n vastelandwye vryehandelsgebied in Afrika (CFTA) sal vestig, asook die gepaardgaande protokol oor handel in dienste, sal na verwagting in Maart 2018 gereed wees.
Die Suid-Afrikaanse Departement van Handel en Nywerheid sê egter in ’n verklaring nog werk moet voor dan aan sommige van die voorlopige bewoording gedoen word. Wanneer die dokumente gereed is, moet die Afrika-unie (AU) se staatshoofde die protokol onderteken.
Onderhandelinge oor die protokol vir handel in goedere, asook sy aanhangsels, sal daarna afgehandel word.
Dr. Rob Davies, Suid-Afrika se Minister van Handel en Nywerheid, was onlangs in Niger waar hy die vierde AU-vergadering van handelsministers bygewoon het.
Dit is deur pres. Mahamadou Issoufou van Niger geopen. Issoufou is ’n kampvegter vir die CFTA. Die ministersvergadering is voorafgegaan deur die agtste CFTA-onderhandelingsforum en die vierde vergadering van senior handelsamptenare.
BELANGRIKE MYLPAAL
Die CFTA sal ’n geïntegreerde, vastelandwye mark van 1,2 miljard mense met ’n bruto binnelandse produk van meer as $2 000 miljard (R27 100 miljard) skep en die beweging van goedere en dienste in Afrika vergemaklik.
Volgens die departement sal dit volhoubare groei en ontwikkeling ontsluit en handel in Afrika bevorder. Dit sal ook voorkeurtoegang vir Suid-Afrikaanse goedere en dienste tot die res van die vasteland bied.
Davies het benadruk hoe belangrik Afrika se agenda vir ontwikkelingsintegrasie is, wat markintegrasie met die ontwikkeling van nywerhede en infrastruktuur kombineer.
“Die afhandeling van die CFTA sal ’n belangrike mylpaal in Afrika se integreringsproses wees. Die CFTA behoort nywerheidsontwikkeling en die ontwikkeling van streekswaardekettings te bevorder.”