STAAK INVOER UIT ‘SLAWERNY-AANLEGTE’
DIE Regering behoort buitelandse aanlegte van waar Suid-Afrika hoendervleis invoer, eers te besoek en goed te keur, sê die Suid-Afrikaanse Pluimveevereniging (SAPV).
Die organisasie het reeds in Januarie dié beroep op die Regering gedoen, maar dit nou herhaal ná bewerings dat werksomstandighede in sommige Brasiliaanse hoenderaanlegte só sleg is dat dit grens aan slawerny. Die bewerings is vervat in ’n verslag van die Amerikaans-gebaseerde instituut vir landbou- en handelsbeleid.
Volgens die instituut is “slawerny” endemies in die Brasiliaanse pluimveesektor.
“As die verslag korrek is, dui dit op heeltemal onaanvaarbare werkstoestande by geriewe wat reusehoeveelhede hoendervleis aan Suid-Afrika voorsien,” sê dr. Charlotte Nkuna, waarnemende uitvoerende hoof van die SAPV.
GEDWONGE ARBEID
Brasilië is die wêreld se grootste hoenderprodusent en die hoofbron van ingevoerde hoendervleis in Suid-Afrika. Dit sluit in meganies ontbeende vleis, waarvan Brasilië al lank Suid-Afrika se hoofverskaffer is, asook bevrore hoenderstukke aan die been. Die hoeveelhede van laasgenoemde het vanjaar gestyg toe invoer uit die Europese Unie weens uitbrekings van voëlgriep beperk is.
“Die SAPV gaan die Regering versoek om die Brasiliaanse regering dringend om kommentaar oor die bewerings te vra. As dit waar is, moet dringende stappe gedoen word.”
Sy sê duisende Suid-Afrikaanse werkers het hul werk verloor weens gestorte ingevoerde hoendervleis uit lande soos Brasilië, terwyl dié land nou ontbloot is as een waar werkers aan vernederende werkstoestande en gedwonge arbeid onderwerp word.
‘LAKSE BEHEER’
Nkuna sê die bewerings kom ’n paar maande ná Brasilië se vrotvleisskandaal toe talle lande, waarskynlik Suid-Afrika, invoer van sommige Brasiliaanse verskaffers verbied het ná onthullings dat onveilige vleis uitgevoer is.
“Die pluimveebewerings is ’n verdere aanduiding van onaanvaarbare toestande by Brasiliaanse produsente en lakse beheer deur die Brasiliaanse regering.”
Die SAPV het in Januarie onder meer aan die Regering se taakspan oor die hoenderbedryf aanbeveel dat aanlegte van waar vleis ingevoer word, besoek en goedgekeur word. Die taakspan het nog geen verslag of aanbevelings gepubliseer nie.
Nkuna sê die SAPV gaan sy kommer oor die Brasiliaanse “slawernyverslag” by die Internasionale Pluimveeraad lug. 1