‘WAG EERS MET MINIMUM LOON’

’N Moratorium moet op die inwerkingtreding van die nasionale minimum loon geplaas word tot Suid-Afrika se ekonomiese situasie verbeter, meen die Konfederasie van Werkgewers van Suid-Afrika (Cofesa).

Die wetsontwerp op die nasionale minimum loon, wat ’n minimum loon van R20 per uur of R3 500 per maand daarstel, is reeds by die Nasionale Vergadering ingedien. Die wetgewing sal na verwagting vanaf 1 Mei 2018 van krag wees.

Die nuwe wetgewing kan die loonrekening vir plaaswerkers in die 2018-’19-belastingjaar met 16,32% laat styg.

Cofesa meen die loon hou nie rekening met faktore soos die droogte, die invoer van goedkoop hoenderprodukte en voëlgriep nie. Die werksverliese weens dié faktore is nog nie alles verreken nie. ’n Geraamde 80 000 werksgeleenthede is in gedrang. In die Wes-Kaap alleen het die droogte reeds meer as 25 000 werksgeleenthede geëis.

Met verdere kredietafgraderings en ’n ekonomiese groeikoers van 0,6% vra Cofesa ’n moratorium op die minimum loon tot die ekonomiese situasie verbeter.

ONBEKOSTIGBAAR

Talle werkgewers het laat weet hulle kan nie die voorgestelde minimum loon bekostig nie, sê adv. Hein van der Walt van Cofesa. Daarby het die droogte talle boere se produksie erg aan bande gelê. Verder beperk die onsekerheid weens grondeise en beleidsonsekerheid diversifikasie en uitbreiding.

Hy waarsku dat die hoër minimum loon bloot die bevoorregte werkers wat reeds in diens is, beskerm, terwyl werkskepping nodig is om aan die 6,2 miljoen werkloses en 10,6 miljoen mense wat toelaes ontvang, ’n uitkoms te bied. Van 2007 tot 2016 het in vervaardigingsektor alleen 450 000 poste verlore gegaan, en die hele Suid-Afrika voel die rimpeleffek daarvan.

2