Nuwe private vennootskap bring plaasgerigte opleiding
DIE landboumaatskappy Villa en die private universiteit Monash Suid-Afrika begin volgende jaar om ’n aantal sertifikaatkursusse aan te bied wat die vaardigheidsen opleidingsbehoeftes van die plaaslike landbou aanpak.
Dr. André Schreuder, voormalige besturende direkteur van Villa, het by die onlangse bekendstelling gesê die twee entiteite se vennootskap is gebore uit die behoefte aan ’n beter benadering tot landbou-opleiding.
“Daar moet ’n meer geïntegreerde benadering gevolg word waar landboustudente – of hulle onlangs gematrikuleer het en of hulle reeds op ’n plaas werk – ’n diploma kan verdien, terwyl hulle terselfdertyd ervaring op die plaas opdoen of voortgaan met hul plaas- of landbouwerk,” sê hy.
In dié verband bied die Monash Villa Academy teoretiese en praktiese opleiding, gerugsteun deur bedryfsbetrokkenheid en volgehoue studenteterugvoer aangaande die kursusse en dosente, om te verseker dat opleiding van die hoogste gehalte gelewer word.
“Ons uitgangspunt van die begin af is dus om eers die behoeftes op die plaas te identifiseer en die kursusse dan daarvolgens op te stel. Sodoende kan ’n werker op ’n plaas eers ’n oorbruggingskursus voltooi, daarna ’n graad 12-kwalifikasie verwerf en dan ’n diplomakursus volg, alles terwyl die mens op die plaas bly werk.”
KAN NIE WAG
Schreuder sê die landbou kan nie vir die Regering wag vir voldoende opleiding nie.
“Die verantwoordelikheid vir opleiding is nie die Regering s’n nie, maar iets wat die landbou vir homself moet doen. Die landboubedryf moet vergeet van kla en eerder die kwessies in opleiding regstreeks aanpak.”
Prof. Alwyn Louw, uitvoerende hoof van Monash Suid-Afrika, sê private hoër onderwys is meer vernuwend en dinamies as openbare instellings. Monash se model word gekenmerk deur afstandsonderrig, buigbaarheid en bedryfsgerigtheid.
Prof. H.B. Klopper, direkteur van kort leerprogramme by Monash, sê daar is slegs ’n handjie vol landbouhoërskole in die land en landbouwetenskap is gewild.
LANDBOUKOLLEGES
“Op tersiêre vlak verskaf 12 landboukolleges gespesialiseerde opleiding, maar die kolleges word provinsiaal, en nie op nasionale vlak nie, geadministreer,” sê hy.
“Tien van die land se 26 universiteite bied landbougrade tot op doktorale vlak aan.
“Verskillende organisasies en staatsdepartemente is verantwoordelik vir landbou-opleiding.
“Op nagraadse vlak is daar egter geen meganisme om die werk van hierdie entiteite te koordineer nie.”
Verder ervaar hoër onderrig in die landbou in Suid-Afrika talle hindernisse, onder meer ’n tekort aan finansiering vir praktiese opleiding, te min dosente, ’n swak oorgang tussen skool- en naskoolse onderrig, en ’n gebrek aan samewerking tussen die verskillende komponente van die stelsel.
“Die geleenthede vir mense wat by die landbou betrokke is, is eindeloos. Ons moet sinvolle beroepsvoorligting koppel aan doeltreffende hoëronderwysprogramme wat potensiële belanghebbendes na die landbou toe sal lok. Die vennootskap het ten doel om dit reg te kry,” sê Klopper. Met die onlangse bekendstelling van Villa en Monash Suid-Afrika se opleidingsvennootskap is ’n aantal kursusse bekend gestel wat reeds van volgende jaar onderrig sal word. Dit is onder meer: ■ Kursusse in gewasverbouing vir wingerd, koring en gars, aartappels, subtropiese gewasse, somergesaaides (mielies, sorghum, bone en sonneblomme), sitrus, kanola en tamaties. ■ Kursusse oor oesbeskerming: Basiese toksikologie, die gebruik van verwysingsmateriaal, die doeltreffende gebruik van oesbeskermingsmiddel-etikette en bymiddels. ■ Die beginsels en praktyke van die bekamping van siektes, onkruid en plae. ■ Plantgroeireguleerders en
toedieningstegnologie. ■ Basiese grondkunde en
besproeiing. ■ Weidingsproduksiebestuur. ■ Industriële plantegroeibe
stuur. ■ Bio-plaagbestrydingsmiddels. ■ Die geïntegreerde bestryding van aalwurms by graangewasse, boomgewasse en groente. ■ Klagtehantering. 011 950 4000