Wees eers bemarker, dan graanboer

Slim sakesin op Safex en strategiese gewasbemarking het die nasionale Jongboer van die Jaar die afgelope 18 jaar goed te pas gekom om reusespronge in die besproeiingsbedryf te maak.

Mnr. Jaco Strauss van die plaas Lekkerkry naby Hartswater in die Noord-Kaap sê tegnologiese vernuwing het hom toegelaat om sy bewerkingspraktyke en produkte te verbeter. “Met die ondervinding wat ek die afgelope 18 jaar opgedoen het, het ek ook geleer om my produkte strategies beter te bemark.”

Jaco glo in diversifikasie – van die grootste vertakkings, wat katoen en grondbone insluit, tot lusern, wat net 3% tot die boerdery-omset bydra. Hy meen daar is altyd plek vir grondbone van goeie gehalte in ’n wisselboustelsel. “Pekanneute is wel die goue sleutel in die produsent se bos sleutels, maar ek diversifiseer eerder my produksie met net ’n gedeelte op die uitvalhoeke en behou die spilpuntverbouing as my hoofboerderypraktyk.”

Danksy verbeterde boerderypraktyke, tegnologiese vordering en grondverkryging het die boerdery-omset sedert 2014 meer as verdubbel en die opbrengs per hektaar het met bykans 59% gestyg.

Van Jaco se doelwitte vir die komende produksiejaar is om sy produkte vooraf te kontrakteer en sy opbrengs op belegging presies uit te werk. “Om mielies te verskans, is baie riskant. Aangesien die lae pryse onder my kosprys is, het ek mielies op die mark teruggekoop om uit ’n verwagte toekomstige prysstyging voordeel te trek.”

Een van die filosofieë waarop hy sy boerdery bou, is dat ’n gebrek aan kontantvloei tot ’n gebrek aan besluitneming lei. Hy probeer dié situasie tot elke prys vermy.

Verder het goeie personeelbestuur, deelname aan werkerbemagtiging en gemeenskapsbetrokkenheid hom ’n waardige wenner van die titel gemaak