LOGISTIEKE NAGMERRIE VIR OORGRENSVERVOER OPGELOS
Een van die jaar se ongewone boereplanne is dié van ’n boerseun van Limpopo. Sy plan? ’n Sagtewarestelsel vir die elektroniese oorbetaling van geld wat oorgange by grensposte en die betaling by brandstofdepots vir vragmotorbestuurders vergemaklik.
Mnr. Willie Esterhuizen van Marken verander Afrika se handelsroetes en grensposte vir vervoermaatskappye van ’n logistieke nagmerrie in ’n administratiewe formaliteit.
Die stelsel is veilig en skakel ook korrupsie uit. Dit vergemaklik vragmotorbestuurders se kontantbehoeftes op lang oorgrensritte in Afrika deur hul koste by grensposte te dek én hul brandstof vooraf uit ’n kantoor te betaal.
Dit het begin toe Willie in 2012 na die Demokratiese Republiek van die Kongo gereis het. Hy het die geleentheid gesien om vir vragmotorbestuurders se maatskappye ’n oplossing te bied deur die goed gevestigde netwerk van Bureau de Change. Daar is ’n kantoortjie by byna elke hoofgrenspos op die vasteland suid van die ewenaar. Dit was dus maklik om dié infrastruktuur te gebruik en so is Inter Africa Transport Forex gestig.
Hy het met vlootbestuurders ooreengekom dat hulle die brandstof, tolgeld en administratiewe grenskoste aan Inter Africa oorbetaal. Dit word dan by grensposte aan vragmotorbestuurders beskikbaar gestel.
Danksy die ontwikkeling van harde- en sagteware kan ’n bestuurder nou by twee brandstofdepots, een in Livingstone en een in Lusaka in Zambië, aanmeld. Sy rekening is vooraf op die stelsel gelaai vir ’n bepaalde hoeveelheid brandstof. “Op die grenspos word dus net papierwerk gedoen.” africabdc.co.za; willie@inter www.transportforex.com