BEPERKINGS OP UITVOER STRAKS GOU VERSLAP
DIE meer as 140 dae wat ’n Suid-Afrikaanse resiesperd in kwarantyn moet deurbring voor hy of sy voet aan wal in Doebai in die Verenigde Arabiese Emirate kan sit, kan tot 16 dae verminder word indien ’n deurbraak in onderhandelinge oor perde-uitvoerregulasies vanjaar gemaak word.
Só berig die internasionale resiesperdwebwerf TRC.
Dit is veelseggend dat die Hongkongse jokkieklub se span internasionale kopers die afgelope naweek die Cape Premier-Volbloedveiling bygewoon het as deel van hul eerste formele besoek aan Suid-Afrika.
Plaaslike en internasionale belangegroepe, onder meer die internasionale federasie van resiesperd-owerhede, werk die afgelope jaar saam om voorste Suid-Afrikaanse bloedlyne en resiesperde volwaardig deel van die internasionale gemeenskap te maak.
Die Europese Unie (EU) het weens uitbrekings van Afrika-perdesiekte Suid-Afrika in 2004 verwyder van die lys lande wat perde regstreeks mag uitvoer. Ná elke uitbreking word dié stremmende uitvoerregulasie met twee jaar verleng. Die huidige uitsluitingstydperk eindig in Junie.
Indien Suid-Afrika die EU se komende oudit slaag, skep dit die geleentheid om resiesperde mettertyd regstreeks na kopers te vlieg ná 16 dae in ’n gerief in Kaapstad waar hulle ten volle teen siektevektore beskerm sal wees.