KRY JOU WILDBOERDERY AAN DIE GANG

DIE eerste Aldam-wildskool, wat op dieselfde grondslag as die Aldam-veeskool aangebied word, vind op 14-15 Maart by die Allemanskraal-vakansieoord naby Ventersburg in die Vrystaat plaas.

Ná nege suksesvolle Veeskole (voorheen die Vleisbeesskool genoem) het die Lewendehawe Registrerende Federasie (LRF) en ander belanghebbendes besluit om ook ’n Wildskool aan te bied om inligting van wêreldgehalte oor wildboerdery aan boere te bied. Dit word met die samewerking van die Universiteit van die Vrystaat en Landbouweekblad gedoen. Die Regering en die Wildprodusentevereniging het ook hul samewerking beloof.

Volgens dr. Michael Bradfield, organiseerder van die Veeskool, gaan van die voorste internasionale kenners van wildboerdery en verwante bedrywe die kursusgangers toespreek. Onderhandelings word nog daaroor gevoer.

Mnr. Cobus Bester, voorsitter van die LRF en ’n vee-en-wildboer van Ventersdorp, sê boerdery – of dit nou met vee of wild is – gaan oor die optimale benutting van die natuurlike hulpbronne; met ander woorde dít wat die natuur het.

“Boerdery moet deesdae méér wetenskaplik en volhoubaar geskied en daarvoor het ’n boer toegang tot kundige inligting nodig. Dit is presies wat die Veeskool bied en is die rede waarom ek reeds vyf keer by die Veeskool was.

“Een van die foute wat ek gemaak het toe ek die wildbedryf betree het, was om dit sonder akkurate inligting te doen. Wildboerdery het nog baie om in te haal sodat wildboere ook presisieboerdery met wild kan toepas,” sê Bester.

KOSTE

Die koste is R5 643 (BTW ingesluit), wat volledige kursusmateriaal, verblyf vir twee dae en alle maaltye insluit. Daar is ook ander opsies vir mense wat net een dag se lesings wil bywoon. Dit kos dan R2 821,50 vir die lesings, kursusmateriaal, maaltye en een nag se verblyf. Mense wat nie wil oorslaap nie, betaal R1 834. Daar is ook goedkoper opsies vir mense wat wil kampeer. Me. Charmaine Alberts (e-pos:

palberts@telkomsa.net of tel. 051 821 1783) behartig die besprekings.

–