Geniet unieke boerestories op ons TV-program!
LANDBOUWEEKBLAD se nuwe TV-program, Landbouweekliks, se derde episode word dié week uitgesaai. Die kollig in dié episode val op die MD Foundation, wat ’n unieke boerdery naby Ficksburg in die Vrystaat bedryf.
Die MD Foundation bestaan uit agt gesinne wat ná verskeie terugslae, soos ’n plaasmoord, ’n verwoestende haelbui en selfs sekwestrasie, besluit het om saamboer ’n kans te gee.
Kykers sal onder meer by mnre. Hannes Pretorius en Jacques Moll van die MD Foundation hoor hoe die MD Foundation die wins van sy bekroonde melkboerdery, asook graan, vleisbeeste, vleis- en wolskape gebruik om projekte, soos ’n laerskool, kleuterskool, nasorgsentrum, hospies en kliniek, te finansier.
Die boerdery en projekte het ’n regstreekse impak op tot 1 000 mense se lewens en word sedert 2010 op dié grondslag bedryf. Volgens Pretorius is die boerdery se sukses in ’n groot mate te wyte aan die groter doel agter die MD Foundation se bestaan – werkskepping en ’n gunstige impak op hul werknemers en die gemeenskap wat hulle dien.
’N GELEENTHEID
Soos die Landbouweekliks-aanbieder Ivor Price tereg opmerk, die MD Foundation is ’n bewys dat enige terugslag in ’n geleentheid omskep kan word.
Naas die besoek aan die OosVrystaat kan kykers ook meer oor beleggingspaarplanne leer by mnr. Ronald King van PSG.
Kykers wat in meganisasie en werktuie belang stel, sal hoor hoekom mnr. Wilhelm van Eeden, plaasbestuurder van die Lakat-boerdery by Delmas, John Deere se 9560R-trekker aanbeveel vir enige boer.
In die groeisegment gesels Landbouweekblad-joernalis Gerrit Bezuidenhout met mnr. Ampie Rautenbach van Monsanto oor dié maatskappy se visie vir saad van topgehalte. Dr. Faffa Malan, die bekende virtuele veearts, gee ook raad oor antibiotikaweerstandigheid by diere.
Op die plaas vertel die MD Foundation se Theunis Pretorius vir Ivor hoekom biologiese en presisieboerdery so belangrik is vir ’n volhoubare boerdery. Om die stadsjapie touwys te maak, word Price ook in elke episode van Landbouweekliks voor ’n uitdaging gestel. Dié week moet hy sy moed bymekaarskraap en ’n koei kunsmatig insemineer (KI) – met skreeusnaakse gevolge!
Nuwe episodes van Landbouweekliks word elke Dinsdag om 19:30 op Via (DStv-kanaal 147) uitgesaai, met heruitsendings op Sondae om 17:30. Die program is ook op DStv Now te sien. Landbouweekliks word deur Brand Republic vervaardig en geborg deur Afgri, GWK, Monsanto (Dekalb), PSG, MSD en Hinterland.