VOORSPELLERS KRAP KOP OOR STEEKSE WEER

BOERE van oor die hele SuiderAfrika het op ’n WhatsApp-groep kop gekrap oor die seisoenale voorspellings vir normale tot bonormale reënval wat laat verlede jaar voorspel is, maar wat in groot dele van die streek nie gerealiseer het nie.

’n Grondeienaar van Namibië het opgemerk dit lyk asof dié voorspellings “versteur” word deur iets wat dit verhinder om ten volle te materialiseer, soos die onlangse sikloon by Madagaskar.

“Die vooruitsig vir ons plaas het dramaties verbeter, maar op die grond het die voorspellings nie tot uiting gekom nie. Voorspellings vir reën hou aan om verder weg te skuif.”

Hy meen daar is toestande wat voorspellingsmodelle “ignoreer of nie kan voorspel nie”.

Prof. Willem Landman van die Universiteit van Pretoria het geantwoord dat die modelle gebrekkig is, maar dit bly die beste gereedskap wat hulle het om voorspellings te maak. “Een van die probleme van die seisoenale tydskaal is die voorspelling van tropiese siklone, veral oor die suidwestelike Indiese Oseaan.

“Wêreldwye modelle voorspel die tropiese stelsels tipies te ver oos en voorspel selde dat hulle in die Mosambiekkanaal ontwikkel of inbeweeg.”

Landman het ook gesê die voorspellingsvermoë het baie verbeter sedert die middel van die 1990’s. Hul voorspelvermoë is baie goed in ongeveer twee derdes van Suid-Afrika se 93 reënvaldistrikte.

KALENDER

Dr. Peter Johnston van die aksiegroep vir klimaatstelsels by die Universiteit van Kaapstad het bygevoeg dat ’n voorspelling oor drie maande net aan die einde van die drie maande beoordeel kan word.

“Een van die groot tekortkominge van sulke voorspellings is die onvermoë om individuele maande te voorspel. Selfs die verifikasiestatistiek wat daartoe kan lei dat ons vertroue in die projeksies het, neem nie die variasie binne ’n seisoen in ag nie, of kan dit nie doen nie.

“Dis moontlik om ’n ‘normale seisoen’ van drie maande te hê, met twee maande wat buitengewoon droog is en een wat besonder nat is.”

“Een rede hoekom ons sukkel om te voorspel vir die individuele maande is omdat die klimaatstelsel en die evolusie daarvan hom nie veel steur aan die Romeinse kalender nie,” sê Landman.