VOLG DIÉ STAPPE
Riglyne wat boere kan volg wanneer hulle die probleem van onwettige jag met honde probeer oplos, is op onlangse samesprekinge met die polisie ter tafel gelê. Die riglyne is:
■ Pas Agri SA se toegangsprotokol toe en vertoon die toepaslike kennisgewing by ingange en grensheinings. Sluit hekke en maak beskadigde omheinings reg.
■ Meld elke geval van onwettige jag met honde by die plaaslike polisiekantoor aan en hou rekord van alle saaknommers.
■ Die misdaadtoneel moet onaangeraak gelaat word totdat die polisie bewyse, soos voertuigbandafdrukke en spore, versamel en aangeteken het. Bewaar die bewysstukke wat nie verwyder kan word nie. Teken die name en adresse van moontlike getuies aan, moenie die feite met getuies bespreek nie en maak aantekeninge oor die posisie van voertuie, verdagtes, honde, hekke en heinings. Waar moontlik, neem foto’s van voertuie, honde en verdagtes.
■ Maak seker dat daar nie verdere verdagtes in die nabyheid is nie.
■ Betrek die naaste DBV om behulpsaam te wees met die konfiskering van die honde.
■ In die geval van skade wat deur honde veroorsaak is, moet grondeienaars ’n saak van kwaadwillige beskadiging van eiendom aanhangig maak en aandring op ’n vergoedingsbedrag.
■ Indien jagbedrywighede voorheen toegelaat is en die grondeienaar dit nou wil beëindig, moet ’n regsprosedure gevolg word om onder meer bure, huurders en gemeenskapslede daarvan in kennis te stel.
■ Boereverenigings moet die plaaslike vervolgingsowerheid betrek by vergaderings waar hulp met die hantering van voorvalle bespreek word.
■ Gebruik die plaaslike prioriteitskomitee om aksieplanne te ontwikkel om die probleem te pak, soos patrollies en bewusmakingsprogramme.