GROOT TRANSAKSIE VAL VAS
’N POGING van Greenyard, een van Europa se grootste verspreiders van vars produkte, om sy Amerikaanse eweknie Dole Food Company oor te koop, het vroeër vandeesmaand skipbreuk gely.
Dole doen reeds sake met nagenoeg 200 Suid-Afrikaanse vrugte- en groenteboere, en besit sitrus- en tafeldruifplase in die Noord-Kaap. Greenyard, van België, se finale aanbod om Dole te koop is op 5 Januarie van die hand gewys.
Volgens mnr. Hannes Nieuwoudt, besturende direkteur van Dole Suid-Afrika, was daar ’n paar haakplekke in die aanvanklike aanbod van Greenyard.
“Daar is gepoog om hierdie haakplekke uit te stryk, maar selfs ná die finale aanbod van Greenyard het die direksie van Dole gemeen daar bestaan beter moontlikhede.
“Ons behoort teen middel Februarie duidelikheid te hê oor watter rigting Dole se direksie
gaan inslaan.”
Intussen gaan sake by Dole voort soos gewoonlik.
WAARDEKETTING
Dole én Greenyard se strategie is om vertikaal in die waardeketting te belê – van die produksiepersele tot by die supermark. Nie een van die twee het egter tot dusver in kleinhandelspersele of platforms vir aanlynverkope aan eindverbruikers belê nie.
Dole was genoteer tot 2013, en ná afloop van privatisering is mnr. David Murdock, die destydse voorsitter, en mnr. Michael Carter, die uitvoerende hoof, beskuldig van aandeelprys-manipulasie. Murdock is met $148 miljoen (R1,8 miljard) beboet.
Sedert April 2017 is Dole besig om weer op die New Yorkse aandelebeurs te noteer.
Greenyard se omset is meer as €3,2 miljard (sowat R48 miljard) en die maatskappy is teenwoordig in Wes-Europa, Amerika en in vier lande in Suid-Amerika.
Dole, wat in 1851 in Hawaii gestig is, het in die eerste drie maande van verlede jaar verkope ter waarde van $1 miljard aangeteken, met ’n netto wins van $17 miljoen.