DROOGTE TEMPER AANPLANTINGS VAN DROËBONE
Die afgelope bemarkingsjaar was ’n besonder suksesvolle een vir droëboonboere, sê mnr. Chris Kleingeld, hoofbestuurder van die Droëboonprodusente-organisasie (DPO).
Die nasionale gemiddelde opbrengs was 1,53 ton/ha, die hoogste nóg. Die gemiddelde pryse was egter laer as in die vorige jaar. Dit het op R14 089/ton te staan gekom – R712/ton laer as in 2016.
Suid-Afrika is steeds ’n netto invoerder van droëbone. Die plaaslike prys word van invoerpariteit afgelei. Met die internasionale daling in Amerikaanse dollar-pryse en die verstewiging van die rand word verwag dat pryse in die bemarkingsjaar 2018 effens kan daal.
Tans word verwag dat Suid-Afrika vanjaar sowat 45 000 ton droëbone sal moet invoer om in die plaaslike vraag te voorsien.
Wat aanplantings betref, word beraam dat dit sowat 51 863 ha (16% meer as verlede jaar) kan beloop. Dit is laer as wat aanvanklik verwag is, hoofsaaklik weens ongunstige weer tydens planttyd.
Kleingeld sê boere in Mpumalanga en Gauteng het minder saad aangeskaf as wat aanvanklik verwag is. Aanplantings daar lyk goed, afgesien van die misgordel (Ermelo en Chrissiesmeer), waar dit baie nat is. Die onlangse hittegolf kan ook die opbrengs daar benadeel. Ook in die Vrystaat is minder geplant as wat verwag is. Aanplantings in die OosVrystaat lyk goed, maar wes van Heilbron is die toestande swak.
In Noordwes lyk die bone oos van Lichtenburg redelik, maar aanplantings daar kry swaar. Wes van Lichtenburg is toestande swak en daar is bykans geen droëlandaanplantings nie.