‘Perke oorskry’: Waterinspeksies kom in Wes-Kaap
DIE DEPARTEMENT VAN WATER EN SANITASIE wil self gaan kyk of watergebruikers in die Wes-Kaap hou by die streng beperkings wat vroeër vandeesmaand afgekondig is te midde van dalende watervlakke.
Volgens mnr. Sputnik Ratau, woordvoerder van die departement, oorskry alle kategorieë watergebruikers tans die teikens wat vasgestel is om die watervoorraad te laat hou tot die volgende reëns val.
Me. Lindiwe Lusenga, die departement se waarnemende direkteur-generaal, het op 12 Januarie in die Staatskoerant perke van 60% op die landbou, en 40-45% op huishoudelike en nywerheidsgebruikers in die Breede-Gouritz- en Berg-Olifants-waterbestuursgebiede afgekondig. Eersgenoemde voorsien water aan feitlik die hele SuidKaap, Tuinroete en Karoo, en laasgenoemde die Kaapse Metropool, Weskus en die Boland tot by Piketberg.
Vir besproeiingsgebruikers geld dié persentasie vir gemiddelde verbruik oor die vyf jaar tussen 2010-’11 en 2014-’15.
Die Wes-Kaapse kantoor van die departement skryf in ’n omsendbrief aan munisipale bestuurders en waterbeheerrade dat ’n drought blitz operation tussen 16 Januarie en 15 Februarie sal plaasvind.
’n Bron met insae in vergaderings tussen watergebruikersverenigings en verteenwoordigers van die departement het gesê die departement sal klem lê op watergebruikers wie se waterrekenings agterstallig is. Daar sal ook gekyk word of watergebruikers hou by regulasies oor watermeting en enige onwettige wateraftappunte sal afgesny word.
WATERHEFFING?
Te midde van die politieke swaard wat verlede week oor die kop van me. Patricia de Lille, Kaapstad se burgemeester, gehang het, het verwarring teen druktyd steeds geheers oor die presiese implikasie van die stad se omstrede beoogde waterheffing op boere.
Mnr. Janse Rabie, hoof van natuurlike hulpbronne by Agri SA, sê te midde van onsekerheid oor of die voorgestelde droogteheffing wel ingestel sal word, is dit ook onduidelik of dit boere binne die stad Kaapstad sal beïnvloed. Daar is egter ’n vermoede dat die landbou uitgesluit sal wees.
“Ons het Agri Wes-Kaap gevra om duidelikheid daaroor by die Stad Kaapstad kry,” sê hy.
Landbou.com sal verder daaroor berig namate die situasie ontwikkel.