Somergraan: Weer pootjie vele saaiboere
GRAANPRODUKSIE in die uiters droë somersaaigebied kan baat vind by die verwagte reënbuie wat vir die laaste paar dae van Januarie en die eerste week van Februarie voorspel word, maar in sommige saaigebiede kon boere skaars ’n vyfde van hul beoogde hektare beplant.
Mnr. Johan van den Berg, klimatoloog van Santam Landbou, sê daar is op kort termyn ’n groter kans op verspreide donderbuie oor die sentrale binneland, na gelang van die tropiese weerpatrone wat verlede week oor die ooskus van die land by Madagaskar die verspreiding van vog benadeel het.
Volgens Van den Berg se beramings is slegs sowat 20% van die verwagte mielie-aanplantings in die Vrystaatse distrikte Ladybrand, Brandfort, Bloemfontein, Dealesville, Hertzogville, Hoopstad en gedeeltes van Wesselsbron afgehandel.
Van die distrikte in Noordwes waar eweneens min mielies aangeplant kon word, is Wolmaransstad, Bloemhof en Schweizer-Reneke.
Hy sê die aanplant van sonneblomme kan nog slaag mits neerslae die saad laat ontkiem.
As reën nie teen 27 Januarie in dele van die mielieproduksiegebied wes van die N1-hoofpad voorkom nie, sal dié plante wat wel ontkiem het, verder doodbrand weens die versengende hitte, ten spyte van voldoende grondwater in sekere dele.
MIKPUNTE NIE GEHAAL
Volgens Graan Suid-Afrika se jongste landbouproduksieverslag is weens die versengende hitte min bykomende graan in die vorige week aangeplant. Boere in die westelike dele kon nie hul beoogde mikpunte behaal nie.
Me. Petru Fourie, ekonoom by Graan SA, sê gewasse in die oostelike deel van die land vaar in die algemeen beter, hoewel toestande baie wisselvallig is.
Minimale bykomende aanplantings is verlede week in Noordwes gedoen, ten spyte van die reën wat kol-kol in die sentrale dele voorgekom het.
Volgens haar beraming is slegs sowat 70% van die gebied se mielies aangeplant en tot dusver 40% van die beoogde sonneblomme. Daar is sprake dat Noordwesters 80-90% van hul beoogde sojabone aangeplant het. Min grondbone is aangeplant.
Benewens die benarde situasie met graanproduksie in die Sentraalen Noordwes-Vrystaat ly die weiding ook saam met die verboude gewasse daaronder, wat die dringendheid van nog neerslae beklemtoon.
LAAT SEISOEN
In die bedieningsgebied van VKB en OVK in die OosVrystaat ly die gewasse ook onder die versengende hitte. Die koringstroopproses staan nou einde se kant toe en die opbrengs is ondergemiddeld, onder meer weens koueskade.
In die Noord-Kaap lyk die toestande in die algemeen goed. Verdamping noodsaak egter hoër as normale vlakke van besproeiing.
Besproeiingsgraan in Limpopo vertoon in die algemeen baie mooi en die aanplanting van droëlandgraan daar het nog ’n paar weke tyd. Dit kan die huidige aanplantingsvlakke van sowat 20% laat verhoog.
Mielieverbouing in Mpumalanga lyk in die algemeen gemiddeld tot bogemiddeld goed met sowat 80% van die mielies wat in die saad kom. Sojaboonontwikkeling verloop heelwat stadiger as verwag weens laat aanplantings, koue en hael.
In KwaZulu-Natal is die toestande baie wisselvallig. Aanplantings is gemiddeld 3–4 weke later as normaal. Sojabone het betreklik meer skade opgedoen weens koue en hael as mielies, en ervaar ook ontkiemingsprobleme.