SA listeriose-uitbreking is die dodelikste nóg
NADAT die besonderhede van 160 pasiënte uit ’n totaal van 748 laboratorium-bevestigde gevalle van listeriose nagespeur kon word, het die dodetal reeds tot 67 gestyg. Dit kan nog veel erger word.
Volgens die Nasionale Instituut vir Oordraagbare Siektes (NIOS) het die meeste gevalle in Gauteng voorgekom, gevolg deur die Wes-Kaap en KwaZulu-Natal.
Amptenare van die Departement van Gesondheid regoor Suid-Afrika probeer nog die minstens 588 ander pasiënte opspoor in ’n poging om die oorsprong van die siekte te bepaal.
Die jongste listeriose-epidemie in Suid-Afrika is die ergste in die wêreld se geskiedenis. Hoewel die siekte in ander wêrelddele ook voorkom, het nêrens nog soveel mense tydens ’n uitbreking daaraan gesterf nie.
Die NIOS sê die bakterieë, wat in grond, water, plante of diere se mis kan voorkom, kan ’n wye verskeidenheid kossoorte besmet. Die feit dat dit van 6 uur tot 70 dae kan duur voor iemand siek word, maak dit veel moeiliker om die bron van besmetting op te spoor.
Die siekte kan nie van een mens na ’n ander oorgedra word nie, maar word veroorsaak deur die inname van besmette kos.
NASPEURBAARHEID
Me. Linda Jackson van Food Focus, ’n voedselveiligheidsliggaam, sê Suid-Afrikaanse kos is baie veilig. Groothandelaars het die afgelope dekade ook hul eie vereistes en standaarde baie verhoog.
Volgens studies is selfs voedsel op die informele mark dikwels baie veilig omdat dit geëet word kort nadat dit voorberei is, sê sy.
Daar is ook genoeg naspeurbaarheid om ’n besmette produk terug te lei na die plek waar dit geproduseer is.
Jackson sê uit internasionale navorsing blyk dit dat die listeriosebakterie soms by blaargroentesoorte voorkom.
“Wat boere van hul kant kan doen, is om te let op die gehalte van water wat hulle gebruik om gewasse mee te besproei, asook die gehalte van misstof. ’n Mens moet egter besef listeriose kan ook in die grond voorkom. Dit is dus nie moontlik om enige besmetting heeltemal te voorkom nie.”
“Wat ons nou in die nagte wakker hou, is om die oorsprong van die huidige uitbreking te vind,” sê me. Matlou Setati van die Suid-Afrikaanse Raad op Gebruikersgoedere. –