DIE ANDER SÊ
DIE Stellenbosse plaas Boschendal het pas 600 000 nuwe vrugtebome aangeplant in ’n projek wat drie jaar geduur het. Permanente werkgeleenthede het van 70 tot 287 toegeneem. Die damme op die plaas is vol. Mnr. Jacques du Toit, hoofbestuurder op Boschendal, sê die damme het op 20 Augustus 2017 begin oorloop. Hy het ook 15 stroompies op die plaas getel wat in die Dwarsrivier inloop, vanwaar dit die Bergrivier voed en in die see invloei.
Boschendal se damkapasiteit is 3½ miljoen kubieke meter – 3 500 megaliter. Boschendal maak uitsluitlik op sy eie damme staat vir alle landbougebruik. Hy onttrek geen water aan die Theewaterskloof, Bergrivier of enige ander staatsdam vir sy boerderybedrywighede nie.
Versigtige en doeltreffende grondbestuur het meegewerk om die damme vol te maak en die water te behou. Die verwydering van indringerplante maak ’n groot verskil aan die watervloei uit die berge, en die bevordering van grondgesondheid verminder waterverbruik in wingerde en vrugteboorde met 30%.
Die Stellenboschdam was einde verlede jaar 97% vol. Dit het niks met die munisipaliteit te doen nie, maar is te danke aan die boere van die Groter Simonsbergbewarea, wat indringerplante in die opvanggebied en waterweë bo die dam uitgewis het. Die landgoedere Tokara en Thelema het die afgelope vyf jaar onverpoos alle indringerplante uitgehaal.