Al meer paniek oor water
TERWYL die Wes-Kaapse premier, me. Helen Zille, pleit vir ’n ramptoestand in die Wes-Kaap weens die droogte en “Dag Zero” vir die provinsie al hoe nader kom, bespeur Manie (te verstane) al meer paniekerigheid in Kaapstad se omgewing.
Janse Rabie, hoof van natuurlike hulpbronne by Agri SA, het verlede week gewaarsku dat koelkoppe en sterk leierskap nodig gaan wees as die krane in Kaapse Skiereiland begin opdroog en die kans is goed dat waterbronne teen April uitgeput kan wees. As grootste verbruiker van water is dit maklik om die vinger na landbou te wys as sondebokke vir die probleem gesoek word.
Dan kan daar maklik vergeet word dat die WesKaap waarskynlik die land se grootste uitvoerder van landbouprodukte is, werk aan 18% van die inwoners verskaf en ’n deurslaggewende rol in die provinsie se ekonomie speel.
Rabie sê soos wat die droogte vererger, is daar al hoe meer beskuldigings wat in ’n verdeelde gemeenskap rondvlieg. Iemand moet die blaam dra en iemand moet betaal!
Tydens ’n vergadering met Nomvula Mokonyane, Minister van Water en Sanitasie, op 4 Januarie het sy die belangrikheid van die landbousektor erken, maar ook gewaarsku dat streng opgetree sal word waar water onwettig gebruik word. Agri SA het heeltemal daarmee saamgestem dat onwettige gebruik tot nadeel van die hele landbougemeenskap is en nie verdedig kan word nie.
‘DAG ZERO’ VIR BOERE
Maar nou lyk dit vir Manie of Dag Zero al vir sommige boere in die Skiereiland reeds aangebreek het. Verskeie sê hul besproeiingswater is reeds amptelik afgesny en hul opgaardamme loop leeg. Hulle voorspel chaos as die water na woongebiede ook opdroog.
“Die dag wat riool nie meer in woongebiede in ’n drein kan afspoel nie, is die dag wat hier chaos in die stad gaan uitbreek. Ek dink nie die owerhede begryp hoe dit gaan lyk nie. Hier kom k*k, verskoon die woordspeling,” voorspel ’n ontstoke boer.
“Ek boer reg langs ’n informele nedersetting en daar is nie ’n manier wat daardie inwoners gaan stilsit en toekyk hoe ek my groente uit my boorgate besproei, terwyl hulle in lang toue moet staan om 25 liter water per persoon te gaan haal nie. Wie gaan 5 000 mense keer as hulle my plaas invaar om water te bekom?” Hy voorspel wanorde en sê die 200 waterpunte wat glo beoog word, is ver te min vir die miljoene mense.
Van die boere is ook ontsteld oor die strenger optrede teen dié wat nie waterbeperkings gehoorsaam nie. “Dit is bloot menslik om alles in jou mag te doen om te oorleef. Ek probeer nie die onwettigheid goedpraat nie maar geen wet of regulasie gaan jou keer om jou wingerd of jou beeste aan die lewe te probeer hou nie. As daar water in die rivier op jou plaas is, gaan jy nie jouself steur aan waterbeperkings nie, want dit is jou voortbestaan wat voor jou oë vrek.”
Manie het simpatie, maar hy kan nie met die redenasie saamstem nie. Koelkoppe en samewerking onder almal is nodig om hierdie wa deur die drif te kry.