WILDBOERE WIL NIE HUL KOP IN LEEUHOK STEEK

WILDBEDRYF SA (WRSA) sê hy gaan nie by die polemiek rakende leeujag betrokke raak voordat hy ál die feite en standpunte deeglik oorweeg het nie.

Die organisasie sê in sy jongste nuusbrief dit is sy mandaat om die volhoubaarheid van wildboerdery in Suid-Afrika op lang termyn te verseker. Hy is nie bereid om in te meng by die mandaat van die Beroepsjagtersver- eniging van Suid-Afrika (Phasa) en ander organisasies nie.

Phasa het einde verlede jaar aangekondig hy gaan sy lede weer toelaat om leeus te jag wat in aanhouding geteel is. Phasa het op sy kongres in 2015 ’n resolusie aanvaar dat sy lede nie leeus sal jag wat in aanhouding geteel is nie. Die besluit van verlede jaar druis in teen die jagbeginsels van baie van die organisasie se lede. Etlike internasionale instellings het hulle weens verlede jaar se besluit van Phasa gedistansieer. Dit strek van die gerespekteerde Boone and Crockett-klub in Amerika, wat hom al sedert 1887 vir etiese jag beywer, tot die Operators’ and Professional Hunting Associations of Africa (Ophaa), die tydskrif Sports Afield en die internasionale reisversekeraar RipCord.

Ophaa het Phasa se lidmaatskap onbepaald opgeskort. Die ander instellings het ál hul verbintenisse met en borgskappe aan Phasa opgeskort.

Die WRSA sê in sy nuusbrief hy gaan ’n beleid van stille diplomasie in hierdie verband volg en eerder regstreeks met die betrokke partye en individue in gesprek tree as om die saak in die openbaar en in die media te bespreek.

Die organisasie sê hy bekyk die saak van alle kante en sal met die betrokke belanghebbendes begin skakel sodra hy gereed is om ’n amptelike standpunt bekend te maak.