DIERESIEKTES IS GROOTSTE PROBLEEM - RPO
DIE Rooivleisprodusente-organisasie (RPO) sal hom by ’n vinnig veranderende bedryfsomgewing moet aanpas om die produsent se volhoubaarheid te help verseker.
Mnr. Koos van der Ryst, voorsitter van die RPO, sê produksie-ontwikkeling is een van die dringendste kernaspekte waaroor die organisasie moet herbesin.
“Ons is steeds midde-in ’n droogte wat die vermindering van aanteeldiere genoodsaak het en ons boere se oorlewingsvermoë benadeel,” sê hy.
Die RPO het sy strategiese benadering op ’n tweedaagse dinkskrum in Bloemfontein bespreek.
Volgens hom is die bekamping van dieresiektes die rooivleisbedryf se grootste probleem. “Ons sal ernstig moet besin oor die sluit van vennootskappe om dié siektes te bestry om Suid-Afrika se status as bek-en-klouseervrye gebied te behou en onder meer brucellose te bekamp.”
Hy sê ook ondersteunende navorsing is een van die kernaspekte waaraan die RPO sal aandag gee. Naspeurbaarheid is ook van belang in dié verband. Ander kritieke punte wat in die strategiese sessie bespreek is, is aanpassings aan die statutêre heffing as ’n toepaslike finansieringsmodel vir onder meer die herstrukturering van navorsingsgeld.
“Ons het aansoek gedoen om die huidige statutêre heffing vir die volgende twee jaar te verleng, aangesien daar nog nie konsensus is oor die aard en omvang van die nuwe funksies van die rooivleisbedryf is nie. Dit sal na verwagting in Maart by die Rooivleisbedryfsforum bespreek word,” sê hy. ’n
Nuwe heffing sal na verwagting in 2020 ingestel word.
Sowat R40 miljoen word jaarliks ingevorder vir die werksaamhede van dié bedryf.
Van der Ryst het sy tevredenheid uitgespreek oor die huidige vlak van vleisinvoer uit Namibië. “Namibië kom die voorskrifte van die uitvoerbeleid na Suid-Afriks ten strengste na, aangesien ons plaaslike mark sy belangrikste bestemming is.”
Hy maan egter dat die vrye beweging van diere oor die Lesotho-grens heen ’n dringender gesondheidsen veediefstalrisiko vir Suid-Afrika inhou.