OBP BULT SPIERE IN ENTSTOFMARK

DIE bestuur van Onderstepoort Biologiese Produkte (OBP) vertrou dat hy in die komende maande genoeg entstowwe beskikbaar sal hê vir plaaslike boere, terwyl hy ’n nuwe aanleg ontwikkel om produksiestandaarde op te skerp.

Dr. Jacob Modumo, die OBP se hoof van sake-ontwikkeling, sê entstowwe vir vee is tans die maatskappy se afdeling wat die vinnigste groei.

Die OBP bemark ook middels vir troeteldiere, parasietmiddels, dipstowwe en bymiddels.

“Die OBP se totale markaandeel is sowat 12% van die mark, terwyl sy markaandeel vir vee-entstowwe by sowat 18% draai.

“Groei in die OBP se afdeling vir vee-entstowwe is egter meer as 10% per jaar,” sê Modumo. Hy meen ook die OBP se probleme met die verskaffing van entstowwe oor die afgelope twee jaar is iets van die verlede.

“Die OBP lê vanjaar baie klem op relevante entstowwe om te verseker Suid-Afrikaanse boere sal nie sonder die belangrikste entstowwe sit nie. Ons het ook reeds genoeg entstowwe vir vektor-gedraagde siektes, soos bloutong, drie-dae-stywesiekte en knopvelsiekte, asook bosluisgedraagde siektes, soos anaplasmose (galsiekte) en rooiwaterentstowwe vervaardig om te verseker boere sal ook nie in die laatsomer sukkel met entstoftekorte nie.”

Hy sê die oprigting van die OBP se projek vir goeie vervaardigingspraktyk (GMP), waar ou infrastruktuur en produksiemiddele vervang en vernuwe word, vorder fluks.