MEERJARIGE DEKLAAG OP MIELIELAND . . . ÉN HY GROEI
Die detail van ’n stelsel waarin mielies kommersieel binne-in ’n permanente dekgewas verbou en natuurlik bemes word, is deur ’n Amerikaanse landboukundige uitgepluis.
Prof. Nicholas Hill van die Universiteit van Georgia en sy span het mielies geplant in ’n land met gevestigde meerjarige witklawer as dekgewas. Stroke van die klawer is doodgespuit en die mielies is in rye in die stroke geplant. Nadat die mielies geoes is, het die klawer weer die hele land oorgeneem.
Nie net het die klawer, ’n peulplant, gratis stikstofbemesting aan die mielies verskaf nie, maar ook onkruid tussen die mielierye onderdruk. Só kon baie kunsmis en onkruiddoder bespaar word.
Die doel van die studie was om vas te stel watter kombinasie van ry- en strookwydtes die beste werk om soveel moontlik stikstof van die klawerplante aan die mielies te voorsien. Nog ’n doel is om die klawer so goed moontlik te laat hergroei nadat die mielies gestroop is.
Die navorsingspan se resultate is in die vaktydskrif Agronomy Journal bespreek.
Hulle het twee strookwydtes (waarin die mielies geplant is) – 20 cm en 40 cm – getoets, asook twee rywydtes (tussen mielierye) – 75 cm en 90 cm. Die ideale kombinasie was uiteindelik 20 cm-stroke en 90 cm-rye. Die proewe is oor twee jaar gedoen. Namate die mielies gegroei en die klawer oorskadu het, het die klawerplante blare afgegooi. Die blare het op die grond geval en ’n dik deklaag gevorm, wat op sy beurt weer stikstof (N) in die grond vrygestel het namate dit ontbind het.
Op dié manier het die witklawer meer as 100 kg N/ha aan die mielies beskikbaar gestel, wys die span se berekenings.
Die wyer rye en nouer stroke was nodig om te verseker dat die witklawer behoorlik hervestig nadat die mielies gestroop is. Die stroke waarin die mielies geplant is, was ook wyd genoeg om te verseker dat die klawer nie die mielie-saailinge se groei onderdruk nie.
Die navorsers het ook gevind dit is nodig om die mieliereste te verwyder om die jaarlikse hervestiging van die klawer te verseker.
Die mielies het sowat 40 dae ná planttyd die klawer só begin oorskadu dat dit blare begin afgooi het. Die klawer het onkruid só goed onderdruk dat tot 80% minder onkruiddoder op die proefpersele met klawer toegedien is teenoor die konvensionele perseel.
Hoewel die mielie-opbrengs op die klawerpersele laer was, was daardie persele uiteindelik winsgewender omdat soveel minder kunsmis en onkruiddoder nodig was.
Nicholas verduidelik dat tussenry-verbouing geen nuwe beginsel in kommersiële saaiery is nie. Dit is egter nog baie onseker presies watter kombinasie van praktyke die heel beste is om die meeste uit so ’n stelsel te haal. Met hierdie navorsing wou hulle antwoorde daarop probeer kry.
“Ons wou begin definieer wat die landboupraktyke is wat klawer sal help om jaar ná jaar in ’n mielieproduksiestelsel te hervestig,” sê hy. –