BOER GROEN, MAAK GELD
Melkboere kan hul invloed op die omgewing verminder sonder om hul wins in te boet.
Dít was die bevinding van dr. Craig Galloway, navorser van die landbouvolhoubaarheidsonderneming Trace & Save, in navorsing vir sy pas verwerfde doktorsgraad in bewaringsekologie aan die Universiteit Stellenbosch (US). Trace & Save bedryf die volhoubaarheidsprojek van Woodlands Dairy naby Humandsdorp.
Om ’n melkboerderystelsel meer volhoubaar te maak, moet boere drie elemente van plaasbestuur toepas: Die plaas moet soveel moontlik melk op die beskikbare grond lewer sonder dat meer kunsmis en voer nodig is. Tweedens moet grondgesondheid beter bestuur word om die behoefte aan kunsmis te verminder. Derdens moet boere hul weidingsbestuur verbeter sodat minder voer van buite die plaas nodig is.
Dit verg egter aktiewer bestuur van boere, sê Craig. Boere moet ondersteun en herinner word om volhoubare praktyke in werking te stel. Hulle wil veral die voordele sien – finansieel én vir die omgewing.
“Baie boere sê ‘dit is nie die moeite werd nie,’ ” sê Craig. Waar boere dit wél toepas, bewys die praktyke egter mettertyd hulself as die beste manier om te boer.
“My navorsing het gewys boere hoef niks aan finansiële winsgewendheid in te boet as hulle die omgewingsimpak van hul praktyke wil verlaag nie,” sê hy. “Boere is optimisties oor en ontvanklik vir volhoubare landbou. Die struikelblok lê by die inwerkingstelling van volhoubare praktyke.” Craig het onder meer melkboere op 65 Oos-Kaapse plase se opvattings oor volhoubare landbou gemeet as deel van sy navorsing.
– Dr. Alec Basson is ’n wetenskapskrywer van die US. craig@ traceandsave.com