SLIM PLAN VIR SLIMFOON

MONTEERSTUK Met slimfone wat deesdae alles van weervoorspellings tot padaanwysings gee, is dit alledaags om ’n foon teen byna elke motor se voorruit op die paneelbord gemonteer te sien. Alle monteerstukke is egter nie ewe goed nie.

Die ideaal is ’n lekker stewige monteerstuk waarvan die arm tussen die suier teen die voorruit en die hegstuk op die paneelbord is sodat die foon so stewig as moontlik geanker is en dit alle onnodige vibrasie uitskakel – veral op plaaspaaie!

Die toestel moet jou foon stewig vashou, maar sonder dat jy ’n graad in meganiese ingenieurswese nodig het om dit daar uit te haal. Om die waarheid te sê, as jy jou foon soos ’n yskasmagneet teen iets kon laat vasplak en net so maklik afhaal, sou dit baie gerieflik wees.

Wel, die Phrone is ’n magnetiese monteerstuk vir fone wat wegdoen met al die onnodige suiers, klampe, hefbome en knippe van tradisionele monteerstelsels. Die monteerstukkie plak gerieflik met sponskleeflint teen die plek waar jy jou foon wil laat staan of hang.

’n Mens kry twee monteerskyfies. Jy kan een in die bakkie sit en een in die gesinsmotor gebruik.

Hoewel dit magneties werk, sal dit nie jou foon se geheue uitwis nie. Die neodymium-magnete is veilig vir alle elektroniese toebehore. Die monteerstukkie agter op die foon klik net magneties teen die monteerskyfie vas en siedaar! Dit kan 360 grade roteer en sit stewig omdat daar nie ’n arm tussen die monteeroppervlak en die foon is wat hefboomkrag uitoefen nie. Prys: Sowat R185 (BTW sal by die poskantoor betaalbaar wees wanneer jy die pakkie gaan afhaal.) ’n Mens bestel dit oor die internet en betaal met PayPal. https://shopparoo.com