Stellenbosse wynmakers jaag Napa-Cabernet se pryse
’N NUWE wynbeweging beywer hom daarvoor dat Cabernet Sauvignon van Stellenbosch prysvlakke van wyn van wêreldgehalte behaal en net so bekend raak soos Cabernet uit die Napavallei in Amerika.
Die nuwe organisasie heet Stellenbosch Cabernet en staan onder leiding van mnr. Christo le Riche van Le Riche-wyne.
Mnr. Kevin Arnold, keldermeester en besturende vennoot van die Waterford-landgoed op Stellenbosch, het op ’n mediabyeenkoms gesê die saadjie vir die beweging is geplant toe ’n aantal jonger én meer gevestigde wynmakers nagenoeg 18 maande gelede besef het hoeveel Cabernet Sauvignon-wingerd in die Stellenbosch-omgewing uitgehaal en hoe min vervang word.
EIESOORTIGE GROND
“Ons het van die beste en eiesoortigste grond en terrein ter wêreld en oor ons gehalte bestaan daar geen twyfel nie, maar prysvlakke het ons in die steek gelaat,” sê Arnold. Volgens hom “kan boere nie op hul grond bly” teen R4 000 tot R6 000 per ton vir Stellenbosse Cabernet Sauvignon nie.
“Hoe gouer Cabernet Sauvignon R12 000 tot R14 000 per ton behaal, hoe beter. Die tyd het gekom dat ons Cabernet red en teen beter pryse verkoop. Ons moet mense laat besef hoe goed Stellenbosse Cabernet Sauvignon is, maar dat ‘goeie waarde’ (vir geld) nie meer aanvaarbaar is nie. ‘Goeie waarde’ kos mense hul grond.”
Waterford se vlagskipversnit, The Jem, waarvan Cabernet Sauvignon die ruggraat uitmaak, word teen R1 100 per bottel verkoop. Dit word hoofsaaklik in Suid-Afrikaanse restaurante of van die plaas af verkoop. Dit is ook beskikbaar in dele van WesAfrika en in Londen, Brittanje.
SPESIFIEKE VEREISTES
“Cabernet stel baie meer spesifieke vereistes as heelparty ander, aanpasbaarder kultivars,” sê mnr. Johan Malan, mede-eienaar van Simonsig. “Dit is ’n kultivar wat laat ryp word, daarom kan dit nie geplant word waar dit te koud is nie. Dit kan ook nie geplant word waar dit te warm is nie, want dan het die son ’n groot invloed op die wyngehalte.” Hy wys daarop dat Stellenbosch ’n lang geskiedenis het van wyne uit die 1940’s, 1950’s en 1960’s wat uitstekend verouder het. Dit bewys die gehalte én verouderingspotensiaal van dié wyn.
Hy sê Stellenbosch Cabernet het onlangs ’n strategiese plan opgestel en ’n konsultant aangestel om met die raamwerk te help.
“Enige veldtog het altyd geld nodig en tot dusver het ons onsself gefinansier, maar met die nuwe, goeie strategie kan ons hopelik ’n borg kry.”
Volgens Arnold begin Stellenbosch Cabernet se planne met die handelskou Cape Wine in September, waarna verskeie plaaslike en internasionale projekte volg.