VERBRUIK STYG MET 21%
IN die afgelope tien jaar het die verbruik van varkvleis in SuidAfrika met 21% gestyg, het me. Marieta Human van die SuidAfrikaanse Varkvleisprodusente-organisasie (Savpo) op die plaas Nelson’s Creek buite Wellington gesê.
Sy was ’n genooide spreker op ’n werksessie oor die gehalte van varkvleis wat deur die varkverbeteringsmaatskappy PIC SA gehou is. “Die strewe is nou om meer mense in die land meer varkvleis te laat eet. Die plan is om verbruik daarvan in die volgende vyf jaar tot ses jaar drasties te laat styg.”
Altesame 60% van Suid-Afrika se bevolking het geen beswaar teen die eet van varkvleis nie. “Dít is die mense wat oorgehaal moet word om méér daarvan te eet,” het sy gesê. Human het gesê hoewel die verbruik van varkvleis styg, is die doelwit nou om te bepaal by watter inkomstegroepe dit die meeste styg, soos die middelklas, armer mense of ryker mense.
In 2017 was die verbruik per kop van hoendervleis 35,7 kg. Beesvleisverbruik beloop 13,6 kg, dié van skaapvleis 2,3 kg en varkvleis 3,75 kg. “Die verbruik van hoendervleis is soveel hoër weens jare van volgehoue promosie en wegneemverkoopspunte, soos KFC en Nando’s.”
Human sê dit is belangrik om jou teikengroepe te verstaan om varkvleisverbruik suksesvol by hulle te laat styg. Voorheen is verkeerdelik geglo dat feitlik alle arm mense in landelike gebiede woon en die meer vermoëndes in stede en metro’s bly. “Dit is nie so nie. Met nuwe kennis word bemarkingsveldtogte aangepas.”
Moeite word ook nou gedoen om verbruikers in te lig oor die moontlikhede om varkvleis in verskillende soorte geregte te verwerk. Ná sulke promosies verdriedubbel verkope.