GEMIDDELDE LIETSJIE-OES VIR 2018 VERWAG
Met die lietsjieseisoen wat einde se kant toe staan, word ’n gemiddelde Suid-Afrikaanse oes vir vanjaar geskat.
“Hoewel uitvoersyfers goed lyk, beleef die oeste ’n gemiddelde jaar. By Nelspruit en Malelane het hoë temperature in die winter die oes benadeel en was die opbrengs laer as verwag,” sê mnr. Bobby Price, voorsitter van die Suid-Afrikaanse Lietsjiekwekersvereniging (SALKV). Hy sê daar is nog nie finale syfers oor die opbrengs nie, maar dit lyk asof oesvolumes in ander streke gemiddeld sal wees.
Hoewel Europa steeds die grootste uitvoermark is, lyk die ontluikende Amerikaanse mark belowend vir toekomstige uitvoer.
“Die lietsjiekwekers is optimisties om op dié mark te kapitaliseer. Ons mikpunt is nou om die mark vir die toekoms te stabiliseer.”
Volgens mnr. Adam Hugo van Gilbert-pakkers op Louis Trichardt het die eerste besending lietsjies na Europa ondergemiddelde pryse behaal vergeleke met vorige jare weens ’n hoë volume uit SuidAfrika. Hy voorsien egter dat pryse sal verbeter namate die besendings uit Suid-Afrika verder verspreid sal wees.
Volgens hom sal toekomstige lietsjievolumes uit Louis Trichardt heel moontlik laer wees omdat verskeie boere wat kleiner boorde onderhou, tans hul lietsjieboorde met dié van neutbome vervang weens die hoër winsmarges.