ONS EIE WEEKLIKSE TV-PROGRAM!
VIA en Landbouweekblad snoer vanjaar kragte saam met ’n nuwe TV-program, Landbouweekliks, waarvan die vierde episode op Dinsdag 30 Januarie te sien is.
Komreissaammet Landbouweekblad na van die land se beste boere. Dié boere bepaal die agenda en dink nuut. Hulle is groot boere, kleinboere, mans én vroue, wit, swart en bruin. Daar is natuurlik ook groot masjinerie, pragtige diere en indrukwekkende landerye!
Landbouweekliks werp nie net lig op die tegniese aspekte van die landbou nie, maar ook op die boere se visie en lewenspad. Kenners gee ook elke week raad en inligting.
Nuwe episodes word elke Dinsdagaand om 19:30 op VIA (DStv-kanaal 147) uitgesaai. Die reeks bestaan uit 26 episodes van ’n halfuur elk en heruitsendings is op Sondae om 17:30.
Die radio-en-TV-persoonlikheid Ivor Price het vir die reeks na plase oor die hele SuidAfrika gereis. Hy het besonderse boere en hul bestuurders en werkers ontmoet.
‘DOEN MEER MET MINDER’
“Boere is van die beste bestuurders in die Suid-Afrikaanse ekonomie,” sê Chris Burgess, redakteur van Landbouweekblad.
“Nie net moet hulle talle veranderlikes, soos die weer en die wisselkoers, suksesvol bestuur nie, maar hulle moet ook met vernuwende oplossings vorendag kom vir byna onoorkomelike probleme.
“Een daarvan is dat hul insetkoste vinniger styg as die prys van die produkte wat hulle lewer. Hulle moet nuut dink, nie net met hul masjinerie nie, maar ook oor hul metodes, om meer met minder te kan doen.
“Die resultaat is besonderse mense met ’n besonderse perspektief op die lewe wat gewone kykers sal verras en verstom.
“Beleef boere soos jy hulle nog nooit vantevore beleef het nie.”
NOG INLIGTING
Volg Landbouweekliks en Landbouweekblad op Facebook en @landbouweekliks en @landbou op Twitter. Volg gerus ook VIA TV op Facebook en @viatv op Instagram om op die hoogte te bly. Besoek Landbou.com vir nog inligting.