Geen bedryf ontsnap dié verwoesting
NÁ 2015 se ondergemiddelde reënval was dit aanvanklik die veebedryf wat swaargekry het, maar sedertdien het die droogte se impak na die hele landbousektor uitgekring.
Volgens mnr. Carl Opperman, uitvoerende hoof van Agri WesKaap, is boere se waterkwotas reeds met gemiddeld 60% besnoei en in die Olifants-Doring-skema is boere se beskikbare water al met 87% ingekort. Boere van die Benede-Bergrivier se waterkwotas is reeds opgebruik.
Aanduidings van hoe die droogte produksie raak, is die volgende:
Die druiwe-oes vir wynproduksie is tot 18% kleiner. Die pruimoes is 10% kleiner, perskes en nektariens 5%-6% en appelkose 16%. Nagenoeg 5% van alle beeste en 22% van alle skape is tot dusver in die Wes-Kaap geslag. Tot die helfte van die normale hoeveelheid kuilvoer is gemaak, wat die melkbedryf benadeel. ’n Tekort aan ruvoer word verwag in gebiede waar ekstensief met diere geboer word. Die uitermatige hitte en watertekorte vererger die situasie.
VOEDSELSEKERHEID
“Ons is beslis bekommerd oor voedselsekerheid,” sê Opperman. ’n Ondersoek het gewys wanneer produsente 60% minder water het, is die gemiddelde afname in voedselproduksie meer as 30%. Daardie ondersoek is gesamentlik deur die Wes-Kaap se departement van landbou, die Buro vir Voedsel- en Landboubeleid (BFAP) en die tegniese afdelings van die landboubedrywe in die Wes-Kaap gedoen.
Die Wes-Kaapse ministerie vir ekonomiese geleenthede bevestig dat die landbou sy kant bring om die waternood te verlig. “Die sektor is deel van die proses en doen alles wat hy kan om in die moeilike tyd met sy werk voort te gaan, met baie boere wat minder geplant het.
“Die gevolg daarvan is dat produksie laer sal wees, wat ook moontlike werkverliese in die komende oestyd kan meebring,” sê me. Bianca Capazorio, woordvoerder van die Wes-Kaapse ministerie vir ekonomiese geleenthede.
HULP
Die provinsiale departement van landbou het sedert verlede jaar geld beskikbaar gestel vir die ondersteuning van opkomende boere in hierdie moeilike tyd. Die provinsiale kabinet het ’n resolusie aanvaar dat hy alle nodige stappe sal doen om geld van die nasionale Regering terug te kry wat hy noodgedwonge weens die waterkrisis moes uitgee. Die voorsiening van water in groot maat is die plig van die nasionale Regering. —