DIE ANDER SÊ
DIE vakverbonde Cosatu en Fedusa meen die Departement van Arbeid het ’n groot flater in die wetsontwerp oor die nasionale minimum loon begaan toe hy die woord “werker” – wat bedoel was om die wet se beskerming te verbreed ten einde soveel moontlik werkers te beskerm – vervang het met die nouer term “werknemer”, soos gedefinieer in die Wet op Basiese Diensvoorwaardes (Wet 75 van 1997). Die departement het toegegee hy het gefouteer en onderneem om die fout reg te stel.
Dit is nie die eerste keer dat ’n wetsontwerp wat deur dié departement voorgelê word, deur Nedlac-onderhandelaars uitgedaag word nie. Die wetsontwerp op werkloosheidsversekering is verlede jaar weens ernstige foute teruggestuur.
Mnr. Matthew Parks, parlementêre leier van Cosatu, het sy bedenkinge uitgespreek oor die vermoëns van die Departement van Arbeid. “Dis kommerwekkend dat die Regering gereeld problematiese veranderinge in die bewoording van wetsontwerpe aanbring nadat die Nedlac-besprekings voltooi is.”
Hy het gesê leierskapsgebreke in die departement het gelei tot ’n vertraging van vyf jaar met die toepassing van die Wet op Werkloosheidsversekering terwyl duisende mense hul werk verloor.
Die wetsontwerp oor die nasionale minimum loon en ander arbeidswette is Woensdag aan die Parlement se portefeuljekomitee oor arbeid voorgelê.