VOORUITSIGTE VIR SONNEBLOMSAAD IS GUNSTIG
’n Geskatte oordragvoorraad wat genoeg vir die volgende twee en ’n half maande se plaaslike mark is, tesame met produksietoestande in die somersaaigebied wat einde Januarie eensklaps van ongunstig na gunstig omgeswaai het, voorspel geen vuurwerk vir die sonneblomsaadprys in die komende weke nie.
Net soos met die res van die somergewasse behoort veranderings in die weer ook hierdie mark se plaaslike bewegings vir die volgende paar maande te oorheers namate die jong oes op die lande ontwikkel, sê mnr. Wandile Sihlobo, ’n ekonoom van die landbousakekamer Agbiz.
Dit is nog redelik onseker hoeveel ekstrahektaresonneblommegesaai is nadat die aanvanklik droogtegeteisterde westelike somersaaigebied einde Januarie uiteindelik met wydverspreide neerslae geseën is.
Baie van hierdie laat aanplantings kan op hektare wees wat boere aanvanklik vir wit mielies opsygesit het, maar wat nie betyds voldoende reën vir mielies gekry het nie.
Volgens die nasionale komitee vir vraag-en-aanbod-beramings het die afgelope sonneblomsaadseisoen einde Februarie met ’n geskatte oordragvoorraad van 183 081 ton afgesluit. Dit is genoeg vir 78 dae se plaaslike verbruik.
Boere het wel volgens die eerste amptelike oppervlakteskatting, wat in Januarie gedoen is, 16% minder sonneblomme geplant as wat hulle in Oktober beoog het.
Die laat aanplantings kan dié prentjie egter verander. Sihlobo sê reënval het reeds die vooruitsigte verbeter, nie net vir die laat sonneblomaanplantings nie, maar ook vroeëre aanplantings. Teen druktyd het die meeste ontleders bespiegel dat die Oesskattingskomitee in sy jongste beramings op 27 Februarie die Januarie-skatting van 560 100 ha vir sonneblomsaad sou verhoog.
Die afgelope vyf jaar, tot 2017’18, was Suid-Afrika se gemiddelde sonneblomsaadopbrengs 1,24 ton per ha.