NÓG MILJOENE BEWILLIG VIR STRYDFONDS TEEN ONTEIENING

GRAAN SA wil R3 miljoen bydra tot Agri SA se regsfonds om onteiening sonder vergoeding teen te staan en sy eie regsfonds met ’n verdere R1 miljoen tot R5,5 miljoen versterk.

Mnr. Jaco Minnaar, voorsitter van Graan SA, het in sy voorsittersverslag op Graan SA se kongres buite Bothaville gesê die organisasie sal deur regsoptrede die Grondwet en die regte van Suid-Afrika se inwoners beskerm.

“Ons antwoord op grondhervorming sonder vergoeding is ’n duidelike ‘nee’. Om die grootste struikelblok vir ontwikkelende boere se volhoubaarheid (toegang tot finansiering) uit te brei na die hele landbousektor sal nie net vernietigend vir die landbou wees nie, maar die hele Suid-Afrika.”

Hy sê die grootste struikelblok vir ontwikkelende boere is toegang tot finansiering. “Daar is meer as genoeg grond beskikbaar, maar nuwe boere kan nie finansiering kry om te boer nie. Die belangrikste rede daarvoor is die gebrek aan titelaktes.

“Dit is een van die redes vir ons sterk teenkanting teen die voorstel van ’n minderheidsparty met die steun van die regerende party oor onteiening sonder vergoeding. As jy die sekuriteit van titelaktes wegneem, neem jy boere se vermoë weg om te kan boer. Die huidige waarde van landbougrond Mnre. Jaco Minnaar (links), voorsitter van Graan SA, en Andries Theron, voorsitter van Graan SA se wintergraanwerkgroep, by van die geskenkte water. is meer as R320 miljard en sonder die sekuriteit wat dit vir finansiering bied, sal dit kommersiële graanproduksie in Suid-Afrika vernietig.”

ÁLMAL SE PROBLEEM

Minnaar sê Graan SA steun grondhervorming en transformasie ten volle. Sedert die boere-ontwikkelingsplan in 1998 begin het, is meer as R400 miljoen aan die ontwikkelende landbou bestee. Net vanjaar is meer as 10 000 boere betrokke by die projek. Graan SA sal voortgaan met projekte, planne en aansporingsmaatreëls om grondhervorming en transformasie te versnel sonder om die volhoubaarheid van boerderye, voedselsekerheid, gemeenskappe en die landbou in gevaar te stel.

Hy sê onteiening sonder vergoeding is nie net die landbou se probleem nie.

“Jou huis in Pretoria, jou onderneming in Durban en jou mynbou-aandeel is ook nou in die gedrang. Die politieke retoriek blaas ook rassespanning aan, wat op sinlose plaasmoorde uitloop.”

‘As jy die sekuriteit van titelaktes wegneem, neem jy boere se vermoë weg om te kan boer.’