CLOVER | Markaandeel groei

Koel, reënerige weer vroeg in Desember het verkope van Clover-produkte effens geblus, maar uitsonderlike verkope op Swart Vrydag het daarvoor vergoed.

Clover, vervaardiger van handelsmerk-verbruikersgoedere en koeldranke, het met die bekendmaking van sy jongste halfjaarresultate gesê sy oorhoofse verkoopsvolume het met 8% gegroei, en sy markaandeel het in verskeie kategorieë gegroei.

Die maatskappy se genormaliseerde inkomste, nadat die invloed van die stigting van Dairy Farmers of South Africa (DFSA) uitgehaal is, het met 7,7% tot R4,2 miljard gestyg. Sy genormaliseerde koste van verkope het met 6,3% gestyg.

Clover het sy volume-gedrewe sake, soos die koop van onverwerkte melk en die bemarking van vars en langlewemelk, op 1 April verlede jaar na sy volfiliaal DFSA geskuif. Melkboere besit sedert Julie verlede jaar die meerderheid aandele daarin. Dié skuif het Clover in staat gestel om hom op waardetoegevoegde produkkategorieë toe te spits.

In die ses maande tot 31 Desember het sy bedryfswins met 14,8% gestyg en sy bedryfsmarge was 8,8%, vergeleke met die vorige ooreenstemmende tydperk se 6,3%.

Mnr. Johann Vorster, uitvoerende hoof, sê teen die einde van die vorige boekjaar het die maatskappy met ’n reeks streng inisiatiewe begin om doeltreffendheid te verbeter, wat nou bemoedigende resultate begin lewer.