MINISTER EN BEDRYF MOET NOU PRAAT OOR HEFFING
MNR. Senzeni Zokwana, Minister van Landbou, Bosbou en Visserye, en belanghebbendes in die graan-en-oliesaadbedryf het tot 3 April om hul geskil oor ’n nuwe, eensydig goedgekeurde heffing op sojabone deur onderhandeling by te lê.
Na aanleiding van ’n dringende aansoek in die Hooggeregshof teen Zokwana deur verskeie belanghebbendes in die graan-en-oliesaadbedryf het sy regspan verlede Donderdag tot ’n tussentydse hofbevel toegestem.
Ingevolge die hofbevel word Zokwana verplig om nie nou die heffing, soos dit op 14 Februarie vanjaar deur hom goedgekeur is, in die Staatskoerant af te kondig nie. Daar moet gewag word tot ’n moontlike skikking bereik is, Zokwana die besluit terugtrek of die besluit deur die betrokke belanghebbendes hersien word, welke stap ook al eerste plaasvind.
INVORDERING
Indien ’n skikking nie teen 3 April bereik word nie, het Zokwana ’n verdere 15 dae om redes vir sy besluit te verskaf, sê mnr. Anton Bekker, die bedryf se regsverteenwoordiger.
“Ons sal die besluit dan laat hersien omdat Zokwana nie geregtig was om ’n heffing vir teling en tegnologie op sojabone (wat vir internasionale saadtelers bedoel was) af te dwing tot voordeel van die Landbounavorsingsraad (LNR) nie.”
Die bedryf het twee jaar gelede om ’n heffing aansoek gedoen sodat plaaslike en internasionale — JOHAN NORVAL saadtelers vir nuwe kultivar- en saadtegnologie vergoed kan word en boere by hoër opbrengste baat kan vind. Zokwana het die heffing goedgekeur, maar eensydig besluit dat die LNR die voorkeurbegunstigde van die heffing moet wees. Dit is ten spyte daarvan dat die LNR nie in staat is om internasionale teelmateriaal aan boere beskikbaar te stel nie.
Die voorgestelde heffing van R65/ton kan ’n inkomste van net meer as R50 miljoen oplewer, waarvan 20% (R10 miljoen) vir transformasieprojekte aangewend moet word.