Somerreën bring groter parasietdruk
Die laat somerreën wat onlangs wyd oor die grootste deel van die noordelike en sentrale provinsies geval het, beteken parasietgetalle kan toeneem. Veeboere moet hul diere fyn dophou vir siektetekens, veral as diere nie ingeënt is nie.
Reeds in Januarie het veeartse talle nuwe gevalle van siektes verwant aan inwendige en uitwendige parasiete aangemeld, sê dr. Faffa Malan, bestuurder van die Herkouerveterinêre Vereniging van Suid-Afrika (RuVASA).
In sy Januarieverslag oor veesiektes maan hy veral teen gevaarlike, bosluisgedraagde siektes, soos Afrika- en Asiatiese rooiwater, anaplasmose (wat ook deur bytende vlieë oorgedra word) en hartwater.
Veeboere moet ook op die uitkyk wees vir bosluisvergiftiging en sweetsiekte.
Die vernaamste insekoorgedraagde siektes hierdie tyd van die jaar, veral ná goeie reën, sluit in knopvelsiekte, drie-dae-stywesiekte en bloutong wat deur muggies, muskiete, steekvlieë en vlieë versprei word.
“Dit is ook wenslik om muskietbevolkings by staande water in toom te hou. Onthou, muskiete is draers van potensieel dodelike siektes, soos slenkdalkoors,” sê hy.
“Waar baie muggies of muskiete in vleilande voorkom, kan boere hul kuddes na hoërgeleë gebiede skuif.”
Raadpleeg jou veearts rakende voorkomende inentingsprogramme, asook kolbehandeling en inspuitbare, opgiet- en dipmiddels wat uitwendige parasiete kan afweer en bestry.
As dit lyk of bosluismiddels ondoeltreffend is, moet jou veearts volgesuigde bosluise versamel en laat toets vir weerstandigheid teen spesifieke aktiewe bestanddele. Bosluisgetalle neem altyd toe ná reën. Bosluise kan ekonomiese belangrike siektes oordra.
Een van dié siektes, Asiatiese rooiwater, is vinnig besig om ’n houvas in die land te kry.
“Van die gevalle wat aangemeld is, sluit in ’n melkkudde waar 20 melkbeeste gevrek het aan Asiatiese rooiwater.
“In ’n ander geval het 25 Charolaisbeeste gevrek aan anaplasmose, ondanks behandeling. Die beeste is verskuif van een gebied waar die siekte nie voorkom nie na ’n ander waar anaplasmose endemies is.”
Op die horison is wel ’n bietjie goeie nuus, sê Dok Faffa.
“’n Nuwe entstof teen hartwater word ontwikkel. Dit sal egter nog ’n jaar of twee duur om die proewe wat nodig is vir registrasie, af te handel.” com www.landbou. Landbou.com