PLAN VIR SKAPE
Aangemelde gevalle deur veeartse van inwendige parasiete, soos rondewurm, weerstandige rondewurm en haarwurm, het bykans in die hele land, buiten die Noord-Kaap, vee geteister. Hou die voorkoms van inwendige parasiete goed dop ná goeie reën.
Die vyfpuntplan wat Dok Faffa vir skape voorskryf, sal boere help om tydig die hulp van ’n veearts in te roep sodra hulle onraad vermoed.
Ondersoek die neus vir tekens van neusvlieglarwes (neuswurm), longwurm, longontsteking, bloutong en skade veroorsaak deur hoë vlakke van ammoniak.
Ondersoek die oog vir bloedarmoede. Die kleur van die oogslymvlies is ’n goeie aanduider en daarvoor is die Famacha-kleurkaart ontwikkel. Bloedarmoede kan dui op besmetting met haarwurm, haakwurm, grootbekwurm, lewerslakwurm en peervormige slakwurm. Ondersoek die skaap vir ’n kwakkeel. Dit kan dui op haarwurm, lewerslakwurm en peervormige slakwurm wat die dier besmet.
Die kondisietelling is ’n goeie aanduiding van die dier se gesondheidstatus. As die kondisie sonder goeie rede verswak, kan dit wees weens bruinmaagwurm, lintwurm, maagbankrotwurm, langnekbankrotwurm, witbankrotwurm, knoppieswurm, grootbekwurm, peervormige slakwurm en sambokwurm.
Die sogenoemde vuilbroektelling dui daarop of die skaap ’n omgekrapte maag weens besmetting met inwendige parasiete het. Van die hoofverdagtes is tipies bruinmaagwurm, maag- en langnekbankrotwurm, witbankrotwurm, knoppieswurm, grootbekwurm, sambokwurm, peervormige slakwurm, lintwurm en koksidiose.