Maagwerking by jong vee word gewoonlik met patogene organismes verbind. Waar kom dit vandaan en hoe tree ’n mens op?
Die algemene gebruik (of misbruik) van antibiotika in die stryd teen dieresiektes is dalk die oorsaak dat skadelike organismes weerstand teen antibiotika opgebou het.
Weerstandbiedende Escherichia coli (en Cryptosporidium) is die hoofoorsaak van epidemiese vrektes by lammers in wydverspreide gebiede in die land. Dit kan ook by kalwers die geval wees.
Die vraag hoe diarree by ver al melkbeeskalwers en hanslammers ontstaan, kan dikwels primêr herlei word na ’n voedingsprobleem, wat weer die gevolg is van ’n bestuursprobleem.
Sien om na die gehalte van die melk of melkvervanger. Die vastestofinhoud is belangrik: 125 g per liter melk by kalwers en sowat 160 g per liter by lammers.
VOLUME
Navorsing dui daarop dat ’n kalf 10% van sy liggaamsgewig per dag moet inneem, verdeel oor drie voedings. Geen ekstra water moet in die uur voor of ná voedings vrylik beskikbaar wees nie, maar wel tussen voedings teen dieselfde volume as die melk.
Navorsing by lammers het getoon dat die volume hanteerbare melk bereken kan word op 50 ml per kg lewende gewig, sonder vrylike toegang tot water. Hierdie eenvoudige reëls het al menige boer se lamvrektesyfer drasties laat afneem.
Goed geventileerde, droë slaapplekke is noodsaaklik en in die winter of koue weer moet kalwers warm gehou word.
VOORSKRIFTE
Gebruik melkvervangers volgens die vervaardiger se voorskrif. Produkte wat met breëspektrumprobiotika verryk is, verminder die risiko van diarree drasties. Probiotika word ook suksesvol gebruik by lammers by wie E. coli met weerstand teen antibiotika voorkom. Dieselfde kan dus verwag word by kalwers.
Met die vestiging van ’n breëspektrumbiotika in die spysvertering van lammers en kalwers kan ’n effens vroeër speentyd verwag word. Dit verminder nie net die risiko van diarree nie, maar ook voedingkoste.
Die byvoeging van ’n polifenoliese antioksidant in die melkvervanger kan, terwyl vitamienpryse baie gestyg het en soms onbekombaar is, ook groei en weerstand bevorder.
www.biorem. co.za; info@biorem.co.za; 086 124 6736.